تیل دیاں قیمتاں دا نواں نظام منظور : پٹرول اک دن لئی 35 پیسے سستا، ڈیزل 5.71 روپے لٹر مہنگا

پٹرول دی نئی قیمت 315 روپے 80 پیسے، ڈیزل دی 360 روپے 6 پیسے لٹر مقرر، نفاذ اج تک ہووے گا، اوگرا دا نوٹیفکیشن جاری؛ اوگرا نوں نویں نظام تے فوری عملدرآمد دا حکم، ایکس ڈپو قیمتاں روزانہ جاری، وزیراعظم دی پیشگی منظوری لوڑ نہیں ہووے گی

اسلام آباد (نامہ نگار، مانیٹرنگ ڈیسک، نیوز ایجنسیاں): اوگرا نے پٹرول 35 پیسے لٹر سستا تے ڈیزل 5 روپے 71 پیسے فی لٹر مہنگا کر دتا اے۔ 35 پیسے کمی توں بعد پٹرول دی نئی قیمت 315 روپے 80 پیسے لٹر ہو گئی اے، جد کہ 5 روپے 71 پیسے مہنگا ہون توں بعد ڈیزل دی نئی قیمت 360 روپے 6 پیسے فی لٹر مقرر کیتی گئی اے، نئی قیمت دا تعین اج تک لئی کیتا گیا اے، اوگرا نے نویں قیمتاں دا نوٹیفکیشن جاری کر دتا اے۔

ایہدے توں علاوہ وفاقی کابینہ نے پٹرولیم مصنوعات دیاں روزانہ قیمتاں دے تعین دا نواں نظام منظور کر لیا اے، کابینہ نے اوگرا نوں ایس نویں روزانہ دے پرائسنگ نظام تے بغیر کسے تاخیر فوری عملدرآمد یقینی بنان دے احکامات جاری کر دتے نیں۔ نویں نظام تحت پٹرول تے ڈیزل دیاں قیمتاں حکومتی دباؤ دی بجائے براہِ راست عالمی منڈی دے لاہے چاڑھے (اتار چڑھاؤ) موجب طے ہون گیاں، اوگرا ہن پٹرول تے ڈیزل دیاں ایکس ڈپو قیمتاں روزانہ جاری کرے گا۔

قیمتاں دے اعلان لئی وزیراعظم یا وفاقی حکومت دی پیشگی منظوری لوڑ نہیں ہووے گی، اوگرا بغیر منظوری قیمتاں دا اعلان کرے گی، پٹرولیم لیوی کابینہ دی مقررہ حد توں ودھ عائد نہیں کیتی جا سکے گی۔ مالی سال 2027 ‘چ ہائی سپیڈ ڈیزل دی درآمد صرف پی ایس او راہیں ہووے گی، جد کہ آئل مارکیٹنگ کمپنیاں نوں مارکیٹ شیئر موجب پٹرول درآمد کرن دی اجازت ہووے گی، ایسے طرحاں مٹی دے تیل تے لائٹ ڈیزل دیاں قیمتاں وی روزانہ مقرر کیتیاں جان گیاں۔