ڈیویڈنڈ آمدن تے 35 فیصد کارپوریٹ ٹیکس نہیں لایا جا سکدا: سپریم کورٹ، ایف بی آر دیاں سبھ اپیلاں مسترد

انکم ٹیکس سیکشن 5 تحت لئیایا گیا 10 فیصد ٹیکس ای قانونی تے حتمی، ایف بی آر دی تشریح قانون نال میل نہیں کھاندی، قانون ساز دے بنائے گئے مخصوص نظام نوں اک پاسے نہیں کیتا جا سکدا، اسلام آباد ہائی کورٹ دا فیصلہ قانون دے مطابق: تفصیلی فیصلہ

اسلام آباد (کورٹ رپورٹر): سپریم کورٹ نے ڈیویڈنڈ انکم تے ٹیکس بابت اہم مقدمے وچ اسلام آباد ہائی کورٹ دا فیصلہ برقرار رکھدیاں آکھیا اے کہ ڈیویڈنڈ آمدن تے صرف انکم ٹیکس آرڈیننس 2001 دے سیکشن 5 دا اطلاق ہووے گا، جبکہ سیکشن 39 تحت 35 فیصد کارپوریٹ ٹیکس نہیں لایا جا سکدا۔ عدالت نے ایف بی آر دیاں سبھ سول پٹیشنز خارج کردیاں اپیل دی اجازت دین توں وی ناں کر دتی۔ جسٹس یحییٰ آفریدی دی اگواہی وچ سپریم کورٹ دے تن رکنی بینچ نے مقدمے دی سماعت کیتی سی، جبکہ تفصیلی فیصلہ جسٹس عقیل احمد عباسی نے لکھیا۔

عدالت نے قرار دتا کہ ڈیویڈنڈ انکم اک وکھرا ٹیکس بلاک اے، جس تے انکم ٹیکس آرڈیننس دے سیکشن 5 تحت متھّی گئی شرح نال حتمی ٹیکس لگدا اے، ایس لئی ایہنوں عام کاروباری آمدن آکھ کے سیکشن 39 تحت 35 فیصد کارپوریٹ ٹیکس نہیں لایا جا سکدا۔ فیصلے وچ آکھیا گیا کہ سیکشن 5 تحت وصول کیتا جان والا 10 فیصد ٹیکس ای ڈیویڈنڈ آمدن تے قانونی تے حتمی ٹیکس ذمہ داری اے، جبکہ ایف بی آر ولوں ایس آمدن نوں نارمل ٹیکس نظام تحت لیاؤن دی تشریح قانون نال میل نہیں کھاندی۔

عدالت نے ایف بی آر دا ایہہ موقف وی مسترد کر دتا کہ کمپنیاں دی ڈیویڈنڈ آمدن نوں کل قابلِ ٹیکس آمدن وچ شامل کر کے 35 فیصد کارپوریٹ ٹیکس وصول کیتا جا سکدا اے۔ سپریم کورٹ نے قرار دتا کہ قانون ساز نے ڈیویڈنڈ آمدن لئی وکھرا تے مخصوص ٹیکس نظام بنایا اے، جیہنوں نظرانداز نہیں کیتا جا سکدا۔ سپریم کورٹ نے آکھیا کہ اسلام آباد ہائی کورٹ دا فیصلہ قانون دے مطابق اے تے ایس وچ دخل انداز دی کوئی تھاں نہیں، ایس لئی ایف بی آر دیاں سبھ سول پٹیشنز میرٹ نہ ہون دی بنیاد تے خارج کیتیاں جاندیاں نیں۔

ایہہ مقدمہ انکم ٹیکس آرڈیننس 2001 دے سیکشن 5 تے سیکشن 39 دی تشریح بابت سی، جس وچ ایف بی آر دا موقف سی کہ کمپنیاں توں ڈیویڈنڈ آمدن تے 35 فیصد کارپوریٹ ٹیکس وصول کیتا جاوے، جبکہ ٹیکس دین والیاں دا کہنا سی کہ ایس آمدن تے صرف سیکشن 5 تحت 10 فیصد حتمی ٹیکس لگدا اے۔ سعودی پاک انڈسٹریل اینڈ ایگریکلچرل انویسٹمنٹ کمپنی، فوجی فاؤنڈیشن، فوجی فرٹیلائزر، کیپ گیس تے ہور کمپنیاں نے ایف بی آر دے موقف نوں اسلام آباد ہائی کورٹ وچ چیلنج کیتا سی، جِتھے فیصلہ اوہناں دے حق وچ آیا۔ بعد وچ ایف بی آر نے ہائی کورٹ دے فیصلے خلاف سپریم کورٹ نال رابطہ کیتا، پر سپریم کورٹ نے وی ہائی کورٹ دے فیصلے نوں برقرار رکھدیاں ایف بی آر دیاں سبھ اپیلاں خارج کر دتیاں۔