چوناوی پربندھ وِچ سارے لکاں نوں رل کے بہتری لیاونی پَوے گی بلاول
کشمیر وِچ ٹرتھ کمیشن تے اتفاق ہو جاوے تے مظاہرین احتجاج پِچھے پا دین، وفاقی وزیر اپنے بیان تے معافی منگے۔ یا وزارت چھڈ دیوے: چیئرمین پی پی
لاہور(مانیٹرنگ ڈیسک): پیپلز پارٹی دے چیئرمین بلاول بھٹو نے آکھیا اے پئی وفاقی وزیر کشمیریوں توں معافی منگے۔ یا وزارت چھڈ دیوے، پاکستان دے چوناوی پربندھ وِچ سارے لکاں نوں رل کے بہتری لیاونی پَوے گی، موقعے تے سہارا ملیا تے اسیں پاکستان دے چوناوی پربندھ وِچ ہور بدلیاں لیاواڈگے۔ ٹی وی نال گل بات کردیاں اوہناں صلاح دتی پئی جے ٹرتھ کمیشن دے بنن تے اتفاق ہو جاوے تے مظاہرین اپنا احتجاج کجھ چِر لئی پِچھے پا دین، جَد کہ حکومت وی کمیشن دی رپورٹ آؤن تیکر ہور کارروائیاں ڈَک دیوے۔
اوہناں آکھیا کشمیر دا مسئلہ صرف 12 سیٹاں دا نہیں سگوں کشمیری لوکاں دے حقاں تے حقِ حکمرانی دا معاملہ اے۔ ماہرین دی صلاح نال کشمیری لوکاں نوں ہور آئینی، سیاسی تے معاشی حق دین دا طریقہ طے کیتا جانا چاہیدا اے، جَد کہ خاص سیٹاں یا آئینی ترامیم بابت فیصلے وی کشمیری لوکاں دی مرضی نال ہونے چاہیدے نیں۔ سکیورٹی خطرے والے کجھ علاقیاں توں علاوہ پورے خطے وِچ فون تے انٹرنیٹ دی پابندی ٹھیک نہیں۔ اوہناں آکھیا پئی اوہناں دی پارٹی وفاقی کابینہ وِچ شامل ہون دی سدھر نہیں رکھدی تے نہ ہی اس بابت کوئی رابطہ ہویا اے۔ اوہناں آکھیا پئی مولانا فضل الرحمن اپنی تقریر توں بنن والے ماڑے تاثر نوں آپ اپنے بولاں نال دُور کر سکدے نیں۔
