جوڈیشل کمیشن: لاہور ہائیکورٹ لئی 10 نویں ججاں دی منظوری

فرہاد شاہ ، امجد پرویز ، اسد باجوہ ، غلام سرور نہنگ ، شیریں عمران ، منور دوگل شامل ، عثمان غنی راشد ، امیر عجم ، خالد ابن عزیز ، اجمل خان نوں بھی ایڈیشنل جج بنان دا فیصلہ ، جسٹس طارق باجوہ مستقل جج ہون گے ، بلوچستان ہائیکورٹ لئی 3 ججاں دی تقرری منظور۔

لاہور ، اسلام آباد (کورٹ رپورٹر) چیف جسٹس پاکستان یحییٰ آفریدی دی صدارت ہیٹھ جوڈیشل کمیشن دے اجلاس وچ لاہور ہائیکورٹ لئی 10 نویں ایڈیشنل ججاں دی تقرری دی منظوری دے دتی گئی۔ اجلاس وچ 24 امیدواراں دے ناواں دا جائزہ لین توں بعد دس امیدواراں نوں لاہور ہائیکورٹ دا ایڈیشنل جج مقرر کرن دی منظوری دتی گئی۔ لاہور ہائیکورٹ دے 10 ایڈیشنل جج مقرر ہون والیاں وچ سید فرہاد علی شاہ ، امجد پرویز ، اسد باجوہ ، غلام سرور نہنگ ، شیریں عمران ، عثمان غنی راشد چیمہ ، منور دوگل ، امیر عجم ملک ، خالد ابن عزیز تے اجمل خان شامل نیں۔ ایہہ سارے 10 نام چیف جسٹس لاہور ہائیکورٹ عالیہ نیلم ولوں اجلاس وچ پیش کیتے گئے جنہاں نوں منظور کر لیا گیا ، ایہہ ساریاں تقرریاں ایڈیشنل جج دے طور تے اک سال لئی کیتیاں گئیاں نیں۔ جوڈیشل کمیشن دی منظوری توں بعد آئینی طریقہ کار دے مطابق متعلقہ کارروائی مکمل ہون تے اوہناں دی تقرری دا باضابطہ نوٹیفکیشن جاری کیتا جائے گا۔

جبکہ لاہور ہائیکورٹ دے ایڈیشنل جج جسٹس طارق باجوہ نوں مستقل جج بنان دی بھی منظوری دے دتی گئی۔ لاہور ہائیکورٹ وچ 10 نویاں تقرریاں توں بعد ججاں دی تعداد 50 ہو جائے گی پر 10 اسامیاں ہنے بھی خالی ہون گیاں کیونکہ لاہور ہائیکورٹ وچ منظور شدہ اسامیاں دی تعداد 60 ہے۔ جوڈیشل کمیشن دے اجلاس وچ بلوچستان ہائیکورٹ وچ 5 ایڈیشنل ججاں دی تقرری دا معاملہ بھی زیرِ غور ہے ، اس دوران 20 امیدواراں دے ناواں تے غور کیتا گیا ، جوڈیشل کمیشن نے اکثریتی رائے نال تن امیدواراں دی تقرری دی سفارش کیتی جبکہ دو اسامیاں خالی چھڈ دتیاں گئیاں۔ بلوچستان ہائی کورٹ لئی جنہاں امیدواراں دی سفارش کیتی گئی اوہناں وچ ڈسٹرکٹ اینڈ سیشن جج اللہ داد روشن ، ڈسٹرکٹ اینڈ سیشن جج عبدالقیوم لہڑی تے محمد رؤف عطا ایڈووکیٹ سپریم کورٹ شامل نیں۔