ایرانی وزیر داخلہ دی اسلام آباد آمد امن معاہدے دی بحالی لئی اہم

ایرانی وزیر داخلہ سکندر مومنی دے دورہ اسلام آباد دا بنیادی مقصد تاں دوطرفہ تعلقات ، باہمی تجارت دا عمل تے سکیورٹی معاملات وچ بہتری ہے ، پر ماہرین ایس دورے دی ٹائمنگ نوں اہم قرار دیندے ہوئے ایہنوں امن معاہدے دی بحالی تے مکمل علاقائی جنگ نوں روکن لئی اک تیز رفتار سفارتی کوشش قرار دیندے نظر آ رہے نیں تے ایس ضمن وچ پاکستانی وزیر داخلہ محسن نقوی دے ایہناں ریمارکس نوں اہم قرار دتا جا رہا ہے جس وچ اوہناں نے ایرانی وزیر داخلہ دا استقبال کردے ہوئے ایہہ امید ظاہر کیتی سی کہ اوہ اچھی خبر لے کے آ رہے نیں۔ ایہہ دورہ ایس وقت ہویا جدوں پاکستان دوست ملکاں دے تعاون نال امریکا تے ایران دے درمیان سفارتی کوششاں دی بحالی دے نال اوہناں نوں جاری رکھن لئی سرگرم عمل ہے تے ایس ضمن وچ پس پردہ رابطیاں دا سلسلہ جاری ہے۔ سکندر مومنی دی وزیراعظم شہباز شریف ، فیلڈ مارشل عاصم منیر تے دوجے اعلیٰ حکام نال ملاقاتاں ایسے وقت وچ ہوئیاں جدوں امریکا تے ایران دے درمیان کشیدگی عروج تے ہے ، البتہ ایران نے ثالثاں ولوں موصول ہون والیاں تجویزاں دا جائزہ لین تے سفارتکاری دے عزم دا اعادہ کیتا ہے ، پاکستان مفاہمتی عمل بارے مطمئن نظر آ رہا ہے۔ ایرانی وزیر داخلہ سکندر مومنی دے دورے دے حوالے نال ایہہ خبراں بھی آ رہیاں نیں کہ ایران نے پاکستان نال تعلقات دا اک نواں دور شروع کر رکھیا ہے۔

جس دی بنیاد باہمی تجارتی عمل نوں قرار دتا جا رہا ہے تے دونوں ملک اپنے درمیان تجارتی حجم نوں 3 ارب ڈالر توں 10 ارب ڈالر تک وسیع کرن بارے پرعزم نیں ، جس لئی روزانہ دی بنیاد تے 2 ہزار ٹرکاں دی آمد دا ہدف مقرر کیتا گیا ہے۔ دونوں ملک جو تقریباً 700 کلومیٹر مشترکہ سرحد رکھدے نیں جس نال زمینی تجارت آسان ہوندی ہے ، ایران توانائی دے وڈے ذخائر رکھدا ہے جدکہ پاکستان نوں گیس ، بجلی تے پٹرولیم دی لوڑ ہے ، ایس شعبے وچ تعاون دونوں لئی منافع بخش ہو سکدا ہے۔ سرحدی تجارت بلوچستان تے ایران دے سرحدی علاقیاں وچ روزگار ، کاروبار تے ترقی دے موقعے پیدا کر سکدی ہے ، ایران دے راستے وسطی ایشیا تے ترکیہ تک رسائی تے پاکستان دے راستے سعودی عرب تے جنوبی ایشیا دیاں منڈیاں تک پہنچ ممکن بن سکدی ہے۔ اطلاعات ایہہ نیں کہ اسلام آباد وچ وزیر داخلہ ایران سکندر مومنی دی حکومتی ذمہ داراں نال ملاقاتاں وچ اہم شعبیاں وچ تعاون لئی اقدامات نوں موثر بنان تے زور دتا گیا تے معاشی شعبے وچ تعاون ودھان دے عمل نوں باہمی اعتماد تے علاقائی استحکام لئی ناگزیر قرار دتا گیا۔

جتھوں تک ایس گل دا سوال ہے کہ امریکا ایرانی وزیر داخلہ دے دورہ اسلام آباد نوں کس طرحاں دیکھ رہا ہوئے گا ، تاں امریکا ایہہ دیکھے گا کہ پاکستان ایران نال تعلقات نوں کس حد تک امریکا ، خلیجی ملکاں تے چین نال توازن وچ رکھدا ہے تے کیہ پاکستان ایران نوں مفاہمتی عمل ول لے کے آؤن وچ کوئی کردار ادا کردا ہے۔ اگر دورے دا مقصد سرحدی سلامتی ، دہشت گردی دے خلاف تعاون تے دوطرفہ تجارت ہووے تاں امریکا ایہنوں دو گوانڈھی ملکاں دے درمیان معمول دے تعلقات تصور کرے گا۔ اطلاعات ایہہ بھی نیں کہ اسلام آباد دیاں ملاقاتاں وچ پاکستان دی قیادت نے ایرانی وزیر داخلہ نوں سعودی عرب دے حوالے نال اپنے مفادات تے ترجیحاں توں بھی آگاہ کیتا تے دَسیا کہ اسیں نہیں چاہواں گے کہ سعودی عرب تے ایران دے درمیان تعلقات متاثر ہون ، بلکہ ساڈی کوشش ہوئے گی کہ خلیج دے معاملے تے ایران تے سعودی عرب اپنے تعلقات نوں استعمال کردے ہوئے علاقائی امن نوں یقینی بنان وچ اپنا کردار ادا کرن۔