قائمہ کمیٹی: ایم ڈی کیٹ اسسمنٹ کمیٹی دے ارکان دی تفصیل منگ لئی
تفصیلات ۲۴ گھنٹیاں وچ کمیٹی نوں دتیاں جان گیاں، وزیرِ صحت دی یقین دہانی
اجلاس وچ امتحانی شیڈول، طالب علماں دیاں شکایتاں، نصاب دا جائزہ تے نظام نوں سدھارن تے زور
اسلام آباد (نیوز رپورٹر): سینیٹ دی ذیلی قائمہ کمیٹی برائے قومی صحت نے ایم ڈی کیٹ (MDCAT) دے امتحانی نظام، طالب علماں دیاں شکایتاں تے اسسمنٹ کمیٹی دے معاملیاں دا جائزہ لیندے ہوئے اسسمنٹ کمیٹی دے ارکان دی مکمل تفصیلات منگ لئیاں نیں۔ وفاقی وزیرِ صحت مصطفیٰ کمال نے یقین دہانی کروائی کہ منگیاں گئیاں تفصیلات ۲۴ گھنٹیاں دے اندر کمیٹی نوں فراہم کر دتیاں جان گیاں۔
سینیٹر انوشہ رحمن دی صدارت ہیٹھ ہوئے اجلاس وچ وفاقی وزیرِ صحت، پی ایم ڈی سی (PMDC) حکام، وکھ وکھ یونیورسٹیاں دے وائس چانسلرز تے کمیٹی ارکان نے شرکت کیتی، جدکہ سینیٹر ثمینہ ممتاز زہری آن لائن شریک ہوئیاں۔ اجلاس وچ وزیرِ صحت دی تاخیر نال آمد تے کچھ ارکان نے اپنے تحفظات دا اظہار وی کیتا۔
پی ایم ڈی سی حکام نے دسیا کہ ایس ورھے ایم ڈی کیٹ پاکستان دے ۳۵ شہراں تے سعودی عرب دے شہر ریاض سمیت ۳۶ مرکزاں تے اکو دیہاڑے (دن) ہوئے گا، جس وچ تقریباً ۱ لاکھ ۳۵ ہزار امیدوار حصہ لین گے۔
چیئرپرسن انوشہ رحمن نے کہیا کہ اوہناں نوں اک ہزار دے نیڑے شکایتاں ملیاں نیں، جنہاں وچ نصاب، امتحانی شیڈول تے تیاری لئی گھٹ ویلا ملن ورگے مسائل شامل نیں۔ وفاقی وزیرِ صحت نے کہیا کہ شکایتاں نوں دور کیتا جاوے گا تے ایس ورھے آخری بورڈ امتحان توں تقریباً تن ہفتے بعد ایم ڈی کیٹ کروایا جاوے گا تاکہ طالب علماں نوں چنگی تیاری دا موقع مل سکے۔ اوہناں سوشل میڈیا تے چَلن والیاں کچھ مہماں پچھے “مافیا” دے سرگرم ہون دا وی دعویٰ کیتا۔
