وزیر اعلیٰ سہیل آفریدی نوں گرفتار کر کے عدالت پیش کرن دا حکم

ریاستی اداریاں خلاف گمراہ کن الزاماں دا کیس: مسلسل عدم پیشی تے وزیراعلیٰ کے پی کے سہیل آفریدی دے ناقابلِ ضمانت وارنٹِ گرفتاری جاری

۳ ستمبر تک پیش نہ ہون تے اشتہاری قرار دین دی کارروائی شروع کرن دی تنبیہ؛ پیکا ایکٹ تحت این سی سی آئی اے وچ پرچہ درج ہے

اسلام آباد (اپنے نامہ نگار توں): سینئر سول جج عباس شاہ دی عدالت نے ریاستی اداریاں تے گمراہ کن الزام لاؤن تے اوہناں دی ساکھ نوں نقصان پہنچاؤن دے کیس وچ، طلبی دے باوجود مسلسل غیر حاضر رہن تے وزیراعلیٰ خیبر پختونخوا سہیل آفریدی دے ناقابلِ ضمانت وارنٹِ گرفتاری جاری کر دتے نیں تے اوہناں نوں گرفتار کر کے عدالت پیش کرن دا حکم دتا ہے۔

گذشتہ دہاڑے سماعت دوران بار بار عدالتی بلاوے دے باوجود وی سہیل آفریدی عدالت پیش نہ ہوئے، جدکہ اوہناں دے وکیل وی کمرہ عدالت وچ موجود نہیں سن، جس تے عدالت نے شدید غصے دا اظہار کیتا۔ جج عباس شاہ نے آکھیا کہ جے اگلی سماعت تے وی سہیل آفریدی پیش نہ ہوئے تاں اوہناں نوں اشتہاری قرار دین دی کارروائی شروع کیتی جاوے گی۔

عدالت نے ایہناں سخت ہدایتاں نال کیس دی ہور سماعت ۳ ستمبر تک ملتوی کر دتی ہے۔ یاد رہے کہ سہیل آفریدی خلاف پیکا (PECA) ایکٹ تحت این سی سی آئی اے (NCCIA) نے مقدمہ درج کر رکھیا ہے۔