سعودی عرب وچ پاکستانی ڈرائیوراں نوں روزگار ملے گا: دواں ملکاں وچالے اہم معاہدہ طے پا گیا

فوجی فاؤنڈیشن، شالان اینڈ جی ایل تے سعودی ہنگر اسٹیشن ڈرائیوراں دی بھرتی یقینی بناؤن گے: سارا عمل میرٹ تے شفافیت نال ہووے گا

پاک سعودی سہ فریقی معاہدہ: ہزاراں ہنر مند پاکستانی ڈرائیوراں نوں سعودی عرب وچ روزگار دے موقعے ملن گے

راولپنڈی (نیوز رپورٹر): پاکستان تے سعودی عرب وچالے افرادی قوت (مین پاور) دے شعبے وچ تعاون ودھاؤن تے بیرونِ ملک روزگار نوں فروغ دین لئی منگل نوں اک سہ فریقی مفاہمتی یادداشت (ایم او یو) تے دستخط کیتے گئے، جس تحت ہنر مند پاکستانی ڈرائیوراں نوں سعودی عرب وچ روزگار دے ہزاراں موقعے فراہم کیتے جان گے۔

فوجی فاؤنڈیشن، شالان اینڈ جی ایل تے سعودی ہنگر اسٹیشن سانجھے طور تے تربیت یافتہ پاکستانی ڈرائیوراں دی بھرتی تے تعیناتی یقینی بناؤن گے۔ بھرتی، دستاویزی کارروائی، ویزا پراسیسنگ تے سعودی عرب وچ تعیناتی دا تمام عمل میرٹ، شفافیت تے باہمی تعاون تحت پورا کیتا جاوے گا۔

معاہدے تے فوجی فاؤنڈیشن پاکستان، شالان اینڈ جی ایل تے سعودی عرب دی آپریٹنگ کمپنی برائے ہنگر اسٹیشن وچالے دستخط کیتے گئے۔ ایہ تقریب ایچ ایم گروپ دے ہیڈ آفس وچ ہوئی۔ فوجی فاؤنڈیشن ولوں میجر جنرل (ر) احسان محمود، شالان اینڈ جی ایل ولوں خالد نواز سدھرائچ، جبکہ سعودی وفد دے سربراہ نازیح النوری نے مفاہمتی یادداشت تے دستخط کیتے۔