پاکستان ایس ویلے 52 ملکاں نوں دواواں برآمد کر رہا اے: وزیر صحت

پاک چین بی ٹو بی کانفرنس وچ فارماسیوٹیکل دے 6 شعبیاں تے خاص توجہ دتی گئی، کانفرنس وچ 22 تجارتی معاہدے، 84 ایم او یوز تے دستخط کیتے گئے: پریس کانفرنس

اسلام آباد (نیوز رپورٹر، اے پی پی) وفاقی وزیرِ قومی صحت سید مصطفی کمال نے آکھیا اے کہ پاک چین بی ٹو بی فارماسیوٹیکل اینڈ ہیلتھ کیئر انویسٹمنٹ کانفرنس وچ فارماسیوٹیکل سیکٹر دے چھ اہم ذیلی شعبیاں تے خاص توجہ دتی گئی، جس دا مقصد پاکستان وچ سرمایہ کاری، ٹیکنالوجی دی منتقلی تے مقامی صنعت نوں وادھا دینا اے۔ وفاقی وزیر نے آکھیا کہ پاکستان ایس ویلے 52 ملکاں نوں دواواں برآمد کر رہا اے، آؤندے اک ورھے دے اندر ڈریپ نوں سو فیصد ڈیجیٹلائز کر دتا جاوے گا۔ پاکستان وچ ورتیاں جان والیاں 13 ویکسیناں مکمل طور تے باہرلی ملکاں توں منگوائیاں جاندیاں نیں، پر حکومت نے ملک دی پہلی قومی ویکسین پالیسی تیار کر لئی اے۔

پریس کانفرنس کردے ہوئے وفاقی وزیر نے آکھیا کہ ایس ویلے پاکستان اپنے لئی 85 فیصد دواواں آپ بناندا اے، پر 95 فیصد کچا مال باہروں منگوایا جاندا اے۔ وزارتِ صحت دی ٹیم نے پاکستانی تے چینی کمپنیاں وچالے بہتر میچ میکنگ دا کم مکمل کیتا، جس دے نتیجے وچ دو دن دی کانفرنس وچ 240 وفداں تے 140 چینی کمپنیاں نے شرکت کیتی، جد کہ 340 دو پاسی کاروباری ملاقاتاں ہوئیاں۔ کانفرنس دے دوران 22 کمپنیاں نے 629.5 ملین امریکی ڈالر مالیت دے معاہدیاں تے دستخط کیتے، جد کہ 800 ملین امریکی ڈالر دیاں مفاہمتی یادداشتاں (ایم او یوز) تے وی دستخط ہوئے۔