سینیٹ کمیٹی: پی اے آر سی بھرتییاں، 105 امیدواراں دی تفصیل منگ لئی
230 اسامیاں وچوں 125 تقرریاں مکمل، باقی 105 امیدواراں دے معاملے زیر التوا قرار، قائمہ کمیٹی نے نتیجے اکھے جاری کرن تے تقرریاں دی مکمل تفصیل منگ لئی
اسلام آباد (نامہ نگار) سینیٹ دی قائمہ کمیٹی برائے قومی غذائی تحفظ تے تحقیق نے پاکستان زرعی تحقیقاتی کونسل (پی اے آر سی) وچ نویاں بھرتیاں نال متعلق 105 امیدواراں دیاں تفصیلات منگ لئیاں۔ چیئرمین سید مسرور احسن دی زیر صدارت ہون والے اجلاس وچ وفاقی وزیر تے سیکرٹری وزارت دی عدم موجودگی پاروں سینیٹر شہادت اعوان دا ایجنڈا موخر کر دتا گیا۔ حکام نے دَسیا کہ 230 اسامیاں دا اشتہار قومی اخباراں تے پی اے آر سی دی ویب سائٹ تے شائع کیتا گیا سی جد کہ تحریری امتحان تھرڈ پارٹی ادارے کینڈیڈیٹس ٹیسٹنگ سروس (سی ٹی ایس) نے کرایا۔ ہر آسامی لئی بہترین پنج امیدواراں نوں انٹرویو لئی شارٹ لسٹ کیتا گیا۔ ہن تک 125 امیدواراں نوں تقرری دے خط جاری کیتے جا چکے نیں جد کہ 105 امیدواراں دے معاملے زیر التوا نیں۔ کمیٹی نے ہدایت کیتی کہ شفافیت یقینی بنان لئی سارے صوبیاں دے امیدواراں دے نتیجے اکھے جاری کیتے جان۔ نال ہی پی اے آر سی نوں آؤندے اجلاس وچ 105 زیر التوا امیدواراں دی مکمل فہرست، تقرریاں دے طریقہ کار تے منظوری دین والی مجاز اتھارٹی دیاں تفصیلات پیش کرن دی ہدایت بھی کیتی۔
