کالعدم ایکشن کمیٹی عوام وچ اثر و رسوخ نہیں رکھدی: سردار عتیق
بلاول کالعدم کمیٹی دی دہشت گردی تے فارن فنڈنگ توں چنگی طرح واقف نیں، اوہناں دی خواہش سی کہ کشمیر الیکشن نہ ہون: “دنیا مہر بخاری کے ساتھ” وچ گفتگو
لاہور (مانیٹرنگ ڈیسک) سابق وزیر اعظم آزاد کشمیر سردار عتیق احمد خان نے آکھیا اے کہ کالعدم ایکشن کمیٹی دی خواہش سی کہ آزاد کشمیر وچ الیکشن نہ ہون تے لوک الیکشن وچ حصہ نہ لین۔ پروگرام “دنیا مہر بخاری کے ساتھ” وچ گفتگو کردے ہوئے اوہناں نے آکھیا کہ کالعدم ایکشن کمیٹی کوئی رجسٹرڈ، سیاسی یا سماجی جماعت نہیں اے۔ ایہ جماعت عوامی مفاد نوں لے کے چل پئی تے تشدد دا راہ اپنایا، توڑ پھوڑ کیتی، 14 یا 15 لاشاں گرا دتیاں، 4 ارب دی پراپرٹی نوں نقصان پہنچایا، ایہ جماعت عوام وچ کوئی اثر و رسوخ نہیں رکھدی، مینوں یقین اے لوک کالعدم کمیٹی توں تھک چکے نیں، اوہناں دا ہن جو بیانیہ آیا اے، ایس وجہ توں لوک ایس توں نفرت کر رہے نیں۔
اوہناں نے آکھیا کہ الیکشن وچ یقیناً ٹرن آؤٹ چنگا ہووے گا، لوک ووٹ دین لئی نکلن گے۔ ہور آکھیا کہ کشمیر وچ جو مسئلہ بنیا ہویا اے، اوہنوں حل کرن لئی حکومتِ پاکستان نے کوشش جاری رکھی ہوئی اے، حکومتِ پاکستان نے کالعدم ایکشن کمیٹی دے جائز تے ناجائز مطالبات مانے، مسئلے نوں حل کرن لئی اسلام آباد دی حکومت لگی رہی، ویلے دے نال نال جے پتا چلیا کہ کالعدم ایکشن کمیٹی دا ایجنڈا مسئلے نوں حل کرن دا نہیں اے تاں اوہدے خلاف ایکشن لیا گیا۔ سوال ایہ اے کہ جے اوہناں دی مقبولیت ہے سی تاں الیکشن وچ حصہ لیندے، اسمبلی وچ بہہ کے اپنے معاملے حل کردے، ایک سوال دے جواب وچ اوہناں نے آکھیا کہ بلاول بھٹو قابلِ احترام شخصیت نیں، کالعدم ایکشن کمیٹی دی دہشت گردی تے فارن فنڈنگ توں اوہ چنگی طرح واقف نیں۔
