طوفانی باراشاں، ہور 15 بندے فوت، بھارت نے پانی چھڈ دتا
چناب وچ اونچے درجے دا سیلاب، سیالکوٹ تے وزیر آباد وچ ہائی الرٹ، حافظ آباد تے چنیوٹ وچ دریا دے کنارے توں نقل مکانی دی ہدایت، بارش کل تک رہے گی
لاہور، سیالکوٹ، اسلام آباد، پشاور (سٹاف رپورٹر توں، نمائندگان دنیا، نیوز ایجنسیاں، مانیٹرنگ ڈیسک) پنجاب تے خیبر پختونخوا وچ مون سون دیاں طوفانی باراشاں دا سلسلہ جاری اے جیدے پاروں درجنوں مکان ڈھے گئے، نیویں علاقیاں وچ پانی گھراں تے کھڑی فصلان نوں ڈبو گیا۔ وکھو وکھ حادثیاں وچ ہور 15 بندے فوت تے کئی زخمی ہو گئے جد کہ بھارت نے سلال تے بگلیہار ڈیم دے گیٹ کھول دتے نیں جیدے توں بعد دریائے چناب وچ اونچے درجے دا سیلاب اے۔ سیالکوٹ تے وزیر آباد وچ ہائی الرٹ جاری کر دتا گیا اے۔ تفصیلات دے مطابق دریائے چناب وچ مرالہ دے مقام تے اونچے درجے دا سیلاب اے تے فلڈ ایمرجنسی نافذ کر دتی گئی اے، حکام دا کہنا اے کہ پانی دی سطح 3 لکھ کیوسک توں ودھ کے 9 لکھ کیوسک تک ہوون دا امکان اے۔
حافظ آباد، چنیوٹ تے جھنگ وچ دریائے چناب دے کناریاں تے رہن والے لوکاں نوں محفوظ تھانواں تے منتقل ہوون دی ہدایت کیتی گئی اے۔ فیصل آباد تے ٹوبہ ٹیک سنگھ دے نیڑے والے پنڈ بھی زیرِ آب آ سکدے نیں، جد کہ ملتان تے مظفر گڑھ دے نیویں پنڈاں لئی بھی الرٹ جاری کر دتا گیا اے۔ ہیڈ مرالہ توں ہیڈ تریموں تک دریائے چناب نال جڑے سارے ضلعیاں وچ ایمرجنسی نافذ کر دتی گئی اے۔ دوجے پاسے ہیڈ مرالہ اتھارٹی دا کہنا اے کہ دریائے جموں توی تے مناور توی وچ بھی اونچے درجے دا سیلاب اے تے پانی دی سطح مسلسل اتے جا رہی اے۔ آخری اطلاعات آؤن تک ہیڈ مرالہ وچ پانی دی آمد 2 لکھ 75 ہزار 608 کیوسک ریکارڈ کیتی جا رہی اے جد کہ ہیڈ خانکی لئی پانی دا اخراج 2 لکھ 58 ہزار 608 کیوسک اے جہاں نچلے درجے دا سیلاب اے۔
دوجی طرف ہیڈ قادر آباد تے پانی دی آمد 1,58,539 کیوسک تے اخراج 1,43,539 کیوسک ریکارڈ کیتا گیا جہاں درمیانے درجے دے سیلاب دی صورتحال برقرار اے۔ شکر گڑھ وچ نالہ نئیں وچ شدید طغیانی پاروں قصبہ نور کوٹ نال جڑے 30 پنڈاں دے راستے پانی ہیٹھ آ گئے، نور کوٹ وچ پل دے نیڑے ٹٹی پلیاں دی تھاں بنایا گیا متبادل راہ بھی سیلابی ریلے وچ بہہ گیا جیدے پاروں درجناں پنڈاں دا نور کوٹ، شکر گڑھ تے نارووال نال زمینی رابطہ ٹٹ گیا۔ ایدھر پنجاب ریسکیو 1122 دے مطابق پچھلے 24 گھنٹیاں دے دوران پورے صوبے وچ بارش تے آندھی دے نتیجے وچ کندھاں تے چھتاں ڈہن نال ہور 8 بندے فوت جد کہ 37 زخمی ہو گئے۔ گوجرانوالہ وچ جناح روڈ تے خالی پلاٹ وچ کھڑے بارشی پانی وچ مرگی دا مریض 18 سالہ شہاب ڈب کے جاں بحق ہو گیا۔ اعوان چوک دے علاقے اسماعیل کالونی دے رہائشی محنت کش شاہد دے گھر دی چھت ڈہن نال ملبے ہیٹھ دب کے شاہد دا 7 مہینے دا پتر تے 5 سالہ دھی موقعے تے فوت ہو گئے جد کہ شاہد، اوہدی گھر والی تے اک پتر زخمی ہو گئے۔
لالہ موسیٰ دے علاقے باہروال وچ مکان دی چھت ڈہن نال 6 سالہ محمد علی تے اوہدا باپ عمران ملبے ہیٹھ دب گئے، پنڈ والیاں نے باپ پتر نوں ٹراما سنٹر پہنچایا جتھے ڈاکٹراں نے محمد علی دی موت دی تصدیق کر دتی۔ گجرات وچ محلہ کریم پورہ وچ گلی ‘چوں لنگھن والی مائی رحمتاں بی بی تے اچانک کندھ آ ڈھی جیدے نتیجے وچ اوہ شدید زخمی ہو گئی، محلہ قصبہ الفضل مسجد دے نیڑے مکان دی کندھ ڈہن نال ماں پتر شدید زخمی ہو گئے۔ نوشہرہ ورکاں دے نیڑے پنڈ منج والی وچ محنت کش شاہد اقبال دے گھر دی چھت ڈہن نال 10 سالہ اذان شدید زخمی ہو گیا تے ہسپتال لجاندے ہوئے راہ وچ ہی دم توڑ گیا۔ سیالکوٹ وچ بارش پاروں چھتاں ڈہن دے تن وکھو وکھ حادثیاں وچ 12 بندے زخمی ہو گئے۔ پاکپتن وچ چک دھاونہ نیڑے 33 ایس پی پنڈ وچ مکان دی چھت ڈہن نال 8 سالہ نور فاطمہ تے 6 سالہ عثمان موقعے تے ہی فوت ہو گئے جد کہ اوہناں دی ماں نسرین بی بی زخمی ہو گئی۔
ساہیوال وچ کوٹ خادم علی شاہ 85/6-R وچ ڈنگراں دے باڑے دی چھت ڈہن نال 35 سالہ ویاہی ہوئی زاہدہ بی بی فوت ہو گئی۔ خیبر دے علاقے لنڈی کوتل وچ باراشاں توں فلیش فلڈ دے دوران تن بندے فوت ہو گئے۔ ایدھر لاہور وچ کچھ گھنٹیاں دی شدید بارش نال کئی وڈیاں سڑکاں چھپڑ دا منظر پیش کرن لگیاں، نیویں علاقیاں وچ پانی جمع ہو گیا، ٹریفک دی روانی متاثر ہوئی۔ لکشمی چوک وچ سب توں وادھ 123.2 ملی میٹر بارش ریکارڈ کیتی گئی، جد کہ پانی والا تالاب وچ 122 تے چوک ناخدا وچ 106 ملی میٹر بارش ہوئی جد کہ شہر وچ اوسطاً 59 ملی میٹر بارش نوٹ کیتی گئی۔ بارش توں بعد لیسکو دے 230 توں وادھ فیڈر ٹرپ کر گئے، جیدے پاروں کئی علاقیاں وچ بجلی دی فراہمی معطل ہو گئی تے شہریاں نوں مشکلاں دا سامنا کرنا پیا۔ دوجے پاسے چنیوٹ وچ دریائے چناب دیاں چھلاں مسجد نوں بہا کے لے گئیاں۔ جسڑ دے مقام تے دریائے راوی وچ پانی دی سطح اتے ہوون پاروں رہائیشیاں نوں نقل مکانی دی ہدایت کر دتی گئی۔ ڈی جی پی ڈی ایم اے عمر عباس میلہ نے دَسیا کہ اتے والے علاقیاں وچ مون سون باراشاں پاروں پنجاب دے دریاواں وچ پانی دے بہاؤ وچ وادھا ہویا اے، باراشاں دا دوجا سپیل کل تک جاری رہن دا امکان اے۔
