گندم، آٹا تے روٹی مہنگی، حکام روٹی 14 روپے دی ویکن تے اڑے ہوئے نیں
لاہور سمیت پنجاب دے وکھ وکھ شہراں وچ روٹی 20 توں 25 روپے وچ وک رہی اے
لاہور (عمران اکبر) پٹرولیم مصنوعات دیاں قیمتاں وچ وادھے توں بعد اگرچہ حکومت نے گندم، آٹا تے روٹی دیاں قیمتاں وچ وادھے دا کوئی نوٹیفکیشن جاری نہیں کیتا، پر اوپن مارکیٹ وچ تناں شےاں مہنگے مل وک رہیاں نیں جد کہ ضلعی حکام روٹی ہر حال وچ 14 روپے وچ ویکن تے اڑے ہوئے نیں۔ اوپن مارکیٹ ذرائع دے مطابق گندم دی فی من قیمت 4 ہزار 550 روپے تک اپڑ گئی اے، جد کہ 20 کلو آٹے دا تھیلا 2 ہزار 220 روپے، 15 کلو آٹے دا تھیلا تقریباً 1 ہزار 670 روپے تے 10 کلو آٹے دا تھیلا 1 ہزار 110 روپے وچ وک رہیا اے۔ لاہور سمیت پنجاب دے کئی شہراں وچ تندوراں تے روٹی سرکاری نرخاں دے الٹ 15 توں 25 روپے تک وک رہی اے۔
لاہور دے پوش علاقیاں رائیونڈ، ملتان روڈ، جوہر ٹاؤن، فیصل ٹاؤن، واپڈا ٹاؤن، ویلنشیا، اقبال ٹاؤن، ماڈل ٹاؤن تے گارڈن ٹاؤن دے بہتے تندوراں تے روٹی 22 توں 25 روپے وچ وک رہی اے۔ ذرائع دے مطابق انارکلی، مال روڈ، اسلام پورہ، سنت نگر، باغبانپورہ، شاہدرہ تے ہور علاقیاں وچ سادی روٹی 20 روپے جد کہ نان 30 روپے وچ وِک رہیا اے۔ نان روٹی ایسوسی ایشن دے مطابق آٹے دی قیمت وچ مسلسل وادھے نال تندور مالکان شدید مالی مشکلاں دا شکار نیں۔ آٹے دی بوری مہنگی ہوون نال روٹی دی پیداواری لاگت وچ وڈا وادھا ہویا اے، ایس لئی موجودہ سرکاری نرخ تے روٹی ویچنا ممکن نہیں۔ حکومت روٹی دے سرکاری نرخاں تے ترت نظرثانی کرے۔ دوجے پاسے ضلعی حکام دا کہنا اے کہ روٹی ہر حال وچ 14 روپے وچ وکائی جاوے گی، جد کہ مہنگی روٹی ویچن والیاں دے خلاف کریک ڈاؤن جاری اے۔
