ن لیگ دی نااہلی تے کرپشن نے پنجاب نوں ڈبو دتا: پیپلزپارٹی

اک دن دی بارش نے حکومت دی کارکردگی بے نقاب کر دتی: ندیم افضل چن

ستھرا پنجاب فراڈ، گندم سکینڈل بھی سامنے آئے گا: وزیراعلیٰ دی تقریر تے ردِعمل

اسلام آباد (سٹاف رپورٹر) مرکزی سیکرٹری اطلاعات پاکستان پیپلز پارٹی ندیم افضل چن نے وزیراعلیٰ مریم نواز شریف دی تقریر تے سخت ردِعمل دیندے ہوئے آکھیا اے کہ ن لیگ دی نااہلی تے کرپشن نے صوبے نوں ڈبو دتا اے۔ اوہناں آکھیا کہ اج پنجاب دی حالت چیخ چیخ کے دَس رہی اے کہ “ستھرا پنجاب” صرف اک نعرہ سی، جبکہ حقیقت ایس دے برعکس اے۔ اک دن دی بارش نے پورے پنجاب وِچ ترقی دے دعویاں دا پول کھول دتا۔ سڑکاں تالاب بن گئیاں تے عوام گھراں وِچ محصور ہو کے رہ گئے۔

اوہناں نے گوجرانوالہ تے لیہ دی صورتِ حال نوں قابلِ رحم قرار دیندے ہوئے آکھیا کہ دوہاں شہراں وِچ بارش توں بعد گلیاں تے بازار ندی نالیاں دا منظر پیش کر رہے نیں۔ “ستھرا پنجاب” اک فراڈ ثابت ہویا اے۔ ارباں روپیاں دے اشتہار تے بلند و بانگ دعوے کیتے گئے، پر زمینی حقائق ایس دے برعکس نیں۔ اوہناں الزام لایا کہ پنجاب حکومت کرپشن دے نویں ریکارڈ قائم کر رہی اے، ترقیاتی فنڈز وِچ لوٹ مار تے کمیشن دا نظام عروج تے اے، جبکہ عوام بنیادی سہولتاں توں بھی محروم نیں۔ ن لیگ نے عوام نال صرف جھوٹھے وعدے کیتے نیں تے بہت جلد گندم دا سکینڈل بھی عوام دے سامنے آئے گا۔ اوہناں دا کہنا سی کہ پنجاب دے عوام ہور دھوکھا برداشت نہیں کرن گے، جبکہ پاکستان پیپلز پارٹی عوام نال کھڑی اے تے ایس حکومت دے خلاف ہر فورم تے آواز بلند کردی رہے گی۔