افغانیاں لئی جعلی دستاویزاں، 2 نادرا افسراں سمیت 4 گرفتار
اسسٹنٹ ڈائریکٹر نادرا انعام الحق، ڈپٹی اسسٹنٹ ڈائریکٹر فیاض احمد شامل، تحقیقات جاری
مزید اہم انکشافات تے گرفتاریاں متوقع: ترجمان ایف آئی اے
کراچی (سٹاف رپورٹر، مانیٹرنگ ڈیسک) افغان شہریاں لئی جعلی شناختی دستاویزاں بناؤن وِچ ملوث 2 نادرا افسراں سمیت 4 ملزماں نوں گرفتار کر لیا گیا اے۔ قانون نافذ کرن والے ادارےآں تے ایف آئی اے نے انٹیلی جنس بنیاداں تے مشترکہ کارروائی کردے ہوئے ایس نیٹ ورک دا سراغ لایا تے ملزماں نوں حراست وِچ لے لیا۔ ترجمان ایف آئی اے دے مطابق ملزماں وِچ اسسٹنٹ ڈائریکٹر نادرا انعام الحق، ڈپٹی اسسٹنٹ ڈائریکٹر نادرا فیاض احمد، چوکیدار جنید احمد تے ایجنٹ محمد عمر شاہ شامل نیں۔
ابتدائی تحقیقات دے مطابق ملزم مبینہ طور تے افغان شہریاں لئی جعلی شناختی دستاویزاں دے اجراء، ریکارڈ وِچ ردوبدل تے دوجیاں غیر قانونی سرگرمیاں وِچ سہولت کاری وِچ ملوث سن۔ ابتدائی شواہد توں ایس نیٹ ورک دے دہشت گرد عناصر نال رابطیاں دی نشاندہی بھی ہوئی اے، جیہدے تے مزید گہرائی نال تحقیقات جاری نیں۔ کارروائی دے دوران اہم ریکارڈ تے دوجے شواہد قبضے وِچ لے لئے گئے جبکہ تحقیقات دا دائرہ مزید وسیع کر دتا گیا اے۔ ترجمان دے مطابق مزید اہم انکشافات تے گرفتاریاں متوقع نیں، ایس نیٹ ورک نال وابستہ تمام سہولت کاراں تے مرکزی کرداراں نوں قانون دے کٹہرے وِچ لایا جائے گا۔
