آزاد کشمیر چوناں اکو دِیہہ کرائیاں جاݨ: سردار یعقوب
ایہوجہے حالات وچ پڑاؤ وار (مرحلہ وار) چوناں نال وکھ وکھ قیاس آرائیاں جَمّݨ گیاں، انٹرنیٹ تے ہور سُویلتھاں بحال کیتیاں جاݨ: مولانا سعید یوسف نال پریس کانفرنس
اسلام آباد (اپݨے رپورٹر توں) آزاد کشمیر دے سابق صدر تے وزیرِ اعظم سردار یعقوب نے منگ کیتی کہ آزاد جموں تے کشمیر دیاں ساریاں چوناں اکو دِیہہ (دن) کرائیاں جاݨ تاں جو کسے وی ونڈ دے تنازعے، غلط فہمی یا سیاسی اثر و رسوخ دا تاثر پیدا نہ ہووے۔ آزاد کشمیر پاکستان دا بیس کیمپ اے تے کشمیری لوک ہمیشاں پاکستان دے نال کھلوتے رہے ہن۔ ایہناں گلاں دا پرگٹاوا ایہناں نیشنل پریس کلب اسلام آباد وچ جے یو آئی دے آگو مولانا سعید یوسف تے ہوراں نال پریس کانفرنس کردیاں کیتا۔ آزاد کشمیر دے سابق صدر تے وزیرِ اعظم سردار محمد یعقوب خان نے آکھیا کہ چوناں دے طریقے اُتے غیر ضروری تنازعیاں توں پاسہ وٹنا چاہی دا اے۔
انہاں آکھیا کہ جے پاکستان وچ رہندے جموں تے کشمیر دے مہاجراں دیاں سیٹاں اُتے چوناں پہلے ہوݨ گیاں تاں ایہدے نال وکھ وکھ قیاس آرائیاں جَمّݨ گیاں، ایس لئی چنگا ایہی اے کہ آزاد کشمیر دیاں ساریاں سیٹاں اُتے اکو واری پولنگ کرائی جاوے۔ آئین وچ وی ایہوجہے حالات دے مطابق گنجائش موجود اے، ساریاں سیاسی جماعتاں دا ایہو مؤقف اے کہ ریاست دے لوکاں نوں اکو ویلے اپݨی رائے دیݨ دا حَق ملنا چاہی دا اے۔ انٹرنیٹ تے ہور رابطے دیاں سُویلتھاں وی بحال کیتیاں جاݨ۔ پریس کانفرنس دے دوران ایہناں زور دِتا کہ چوناں شفاف، منصفانہ تے سارے ھیلیاں (فریقاں) لئی منݨ یوگ ہوݨیاں چاہیدیاں ہن تاں جو آزاد کشمیر وچ سیاسی استحکام تے قومی یکجہتی نوں وادھا مل سکے۔
