کاروباری شراکت نال پاک چین دوستی ودھے گی: وزیر اعظم
4.6 ارب ڈالر آئی ٹی برآمدات تے ٹیم نوں شاباش، انفراسٹرکچر بہتر بناؤن دی ہدایت
اسلام آباد (نامہ نگار) وزیر اعظم شہباز شریف نے کہیا کاروباری شراکت نال پاک چین دوستی ودھے گی، انہاں خیالات دا اظہار انہاں نے چینی کمپنی فیمسن دے چیف ایگزیکٹو افسر جیک چین دی قیادت وچ ملن والے وفد نال گفتگو کردے ہوئے کیتا، وزیر اعظم نے چینی کمپنی دا پاکستان وچ اجناس دے سٹوریج دے مرکزاں نوں سٹیٹ آف آرٹ مرکزاں وچ تبدیل کرن دے منصوبے دا خیر مقدم کیتا تے کہیا کہ اس منصوبے نال ملک وچ زراعت دے سیکٹر وچ جدید ترین ٹیکنالوجی آوے گی تے تجارتی سرگرمیاں نوں فروغ ملے گا۔ پاکستان دی افرادی قوت دی ہنر مندی تے تربیت نوں انہاں منصوبیاں دا حصہ بنایا جاوے۔
دریں اثنا وزیر اعظم شہباز شریف نے پاکستان دی سالانہ آئی ٹی برآمدات 21 فیصد اضافے نال 4.6 ارب امریکی ڈالر تک پہنچن تے وزیر انفارمیشن ٹیکنالوجی تے تمام ٹیم نوں شاباش دیندے ہوئے کہیا کہ آئی ٹی برآمدات وچ نمایاں اضافہ حکومت دی ڈیجیٹل معیشت دی ترقی لئی لئے جان والے اقدامات تے پالیسیاں دا ثمر اے۔ انہاں خیالات دا اظہار انہاں نے آئی ٹی شعبے دی سٹرٹیجک روڈ میپ تے پیش رفت دے جائزہ اجلاس دی صدارت کردے ہوئے کیتا۔ وزیر اعظم نے کہیا کہ ملک وچ آئی ٹی دے شعبے دا فروغ تے آئی ٹی نال متعلق برآمدات وچ اضافہ حکومت دی اولین ترجیحات وچ شامل اے۔ انہاں نے ہدایت کیتی کہ آئی ٹی دے شعبے وچ دتے جان والے تربیتی کورسز دی معتبر تھرڈ پارٹی ویلیڈیشن یقینی بنائی جاوے۔
آئی ٹی دے شعبے وچ تربیت دے معیار تے کوئی سمجھوتا نہیں ہووے گا۔ وزیر اعظم نے ملک بھر وچ ڈیجیٹل انفراسٹرکچر ہور بہتر بناؤن دی ہدایت کیتی۔ اجلاس دے دوران بریفنگ وچ دسیایا گیا کہ موبائل سپیکٹرم دی دستیابی جون 2025 وچ 274 میگا ہرٹز توں ودھ کے جون 2026 وچ 880 میگا ہرٹز ہو گئی۔ باغ، آزاد جموں و کشمیر وچ سافٹ ویئر ٹیکنالوجی پارک مکمل ہو چکا اے۔ حکومتِ پاکستان دی 130 سروسز نوں ڈیجیٹائز کیتا جا چکا اے۔ ویمن انوویشن اینڈ سٹارٹ اپ ایمپاورمنٹ لیب دے منصوبے دا افتتاح جلد ہی ہووے گا۔
چینی کمپنی علی بابا نال مفاہمتی یادداشت دے تحت وفاقی حکومت دی کئی وزارتاں تے اداریاں وچ مصنوعی ذہانت (AI) دے نفاذ تے اس حوالے نال کئی منصوبے تے تربیتی سیشنز منعقد کیتے جا رہے ہن۔ علاوہ ازیں شہباز شریف نے بہبودِ آبادی دے حوالے نال اہم جائزہ اجلاس دی صدارت کردے ہوئے کہیا کہ تیزی نال ودھدی ہوئی آبادی ملک لئی سب توں وڈا چیلنج اے۔ ودھدی ہوئی آبادی تے قابو پاؤن لئی اقدامات تے بہبودِ آبادی نوں قومی فریضہ سمجھیا جانا چاہیدا اے۔ آبادی وچ توازن ہی پائیدار قومی ترقی دی ضمانت اے۔ بہبودِ آبادی دے اقدامات دے حوالے نال صوبیاں نال رابطے تے ہم آہنگی نوں ہور بہتر بنایا جاوے۔ وزیر اعظم نے نیشنل پاپولیشن کونسل دا اجلاس جلد توں جلد بلان دی ہدایت کیتی۔
