ایرانی وزیرِ داخلہ دی مزارِ اقبال تے حاضری، الیکشن کمیشن دا دورہ
سکندر مومنی دے لاہور پہنچن تے گورنر سلیم حیدر تے محسن نقوی نے استقبال کیتا، چیف الیکشن کمشنر دی وفد نوں الیکشن کمیشن دی ٹریننگ اکیڈمی وچ تعاون دی پیشکش
لاہور (سپیشل رپورٹر، دنیا نیوز) گورنر پنجاب سردار سلیم حیدر خان تے وفاقی وزیرِ داخلہ محسن نقوی نے گزشتہ روز ایرانی وزیرِ داخلہ اسکندر مومنی دی لاہور ایئرپورٹ آمد تے انہاں دا پر تپاک استقبال کیتا۔ گورنر پنجاب نے ایرانی وزیرِ داخلہ دے ہمراہ مزارِ اقبال تے حاضری دتی، پھُل رکھے تے فاتحہ خوانی کیتی۔ اس موقعے تے دوہاں ملکاں دی ترقی، خوشحالی تے استحکام لئی خصوصی دعا کیتی گئی۔ گورنر سلیم حیدر نے کہیا کہ پاکستان ہر مشکل گھڑی وچ ایران دے نال کھلوتا رہے گا، پاکستان نے ایران امریکا جنگ وچ ثالثی دا کردار ادا کر کے خطے وچ امن لئی کلیدی کردار ادا کیتا اے۔ انہاں نے کہیا سانوں اپنے دوست ملک ایران تے فخر اے جس نے دشمن دی جارحیت دا بھرپور تے موثر طریقے نال جواب دتا تے سرخرو ہویا۔
دریں اثنا ایرانی وزیرِ داخلہ اسکندر مومنی دی قیادت وچ اعلیٰ سطح دے وفد نے الیکشن کمیشن پاکستان دا دورہ کیتا، چیف الیکشن کمشنر سکندر سلطان راجہ نے وفد دا خیرمقدم کیتا۔ اعلامیے دے مطابق ایرانی وفد وچ گورنرز، وزرا تے ایران دے اہم سرکاری اداریاں دے اعلیٰ حکام شامل سن جبکہ سیکرٹری الیکشن کمیشن نے وفد نوں ادارے دے آئینی ڈھانچے تے انتخابی نظام تے تفصیلی بریفنگ دتی۔ چیف الیکشن کمشنر نے ایرانی وفد نوں الیکشن کمیشن دی ٹریننگ اکیڈمی وچ تعاون دی پیشکش کردے ہوئے کہیا کہ پاکستان تے ایران دے برادرانہ تعلقات نوں انتخابی تعاون دے ذریعے ہور مضبوط بنایا جا سکدا اے۔ بریفنگ وچ دسیایا گیا کہ پاکستان وچ انتخابی عملہ سرکاری ملازمین تے جوڈیشل افسران تے مشتمل ہوندا اے۔ اعلامیے دے مطابق ایرانی وزیرِ داخلہ اسکندر مومنی نے مشکل ویلے وچ پاکستان دی حمایت نوں سراہیا تے چیف الیکشن کمشنر سکندر سلطان راجہ نوں ایران دے دورے دی دعوت بھی دتی۔
