بارشاں، دریاواں دے بہاؤ، آبی ذخیریاں دی مسلسل نگرانی کیتی جاوے: صدر

اسلام آباد (سٹاف رپورٹر) صدرِ مملکت آصف علی زرداری نے مون سون بارشاں وچ شدت نوں دیکھدے ہوئے وفاقی، صوبائی تے مقامی حکام نوں ہدایت کیتی اے کہ عوام دے جان و مال دے تحفظ لئی ریسکیو، امدادی تے حفاظتی اقدامات ہور موثر تے تیز کیتے جان۔

انہاں نے کہیا کہ شدید بارشاں پاروں اچانک سیلاب، بادل پھٹن، گلیشیائی جھیلاں دے پھٹن (گلوف)، لینڈ سلائیڈنگ، دریاواں وچ طغیانی تے شہری سیلاب دے خطرے ودھ گئے ہن۔ صدرِ مملکت نے حالیہ بارشاں دے نتیجے وچ قیمتی انسانی جندڑیاں دے ضیاع تے املاک نوں پہنچن والے نقصان تے ڈونگھے دکھ دا اظہار کردے ہوئے جاں بحق افراد دے اہل خانہ نال تعزیت تے متاثرہ خانداناں نال یکجہتی دا اظہار کیتا۔ انہاں نے نیشنل ڈیزاسٹر مینجمنٹ اتھارٹی (این ڈی ایم اے)، صوبائی ڈیزاسٹر مینجمنٹ اتھارٹیز، صوبائی حکومتاں تے ضلعی انتظامیہ نوں ہدایت کیتی کہ باہمی رابطے موثر بنائے جان، ویلے سر وارننگ جاری کیتی جاوے تے بارشاں، دریاواں دے بہاؤ تے آبی ذخیریاں دی مسلسل نگرانی کیتی جاوے۔ صدرِ مملکت نے ہدایت کیتی کہ خطرے نال دوچار آبادیاں تے بنیادی ڈھانچے دا تحفظ یقینی بنایا جاوے۔ علاوہ ازیں صدرِ مملکت نے مصر دے صدر عبدالفتاح السیسی تے مصر دے برادر عوام نوں قومی دن تے مبارکباد دا پیغام دتا۔ صدرِ مملکت نے کہیا کہ پاکستان مصر نال اپنے تعلقات نوں انتہائی قدر دی نگاہ نال دیکھدا اے۔