لوک دھیاں دی ویلاہ (شادی) لئی رکھیا سونا ویچ کے بجلی دا بل جمع کراؤن تے مجبور نے : پی اے سی

جس بندے دی مہینے دی آمدن صرف ویہہ ہزار ہووے، اوہنوں اک لَکھ روپے دا بل دیوو گے تاں اوہ بجلی چوری ہی کرے گا : کمیٹی ممبران؛ اوور بلنگ دے پیسے صرف شکایت درج کراؤن والے صارف نوں واپس کیتے جاندے نے : آڈٹ حکام دی کمیٹی نوں بریفنگ

اسلام آباد (اے پی پی) پبلک اکاؤنٹس کمیٹی (پی اے سی) دا اجلاس شاہدہ بیگم دی صدارت تھلے ہویا جس وچ پاور ڈویژن دی آڈٹ رپورٹ 2024-25 دا جائزہ لیا گیا۔ پی اے سی ممبران نے کہیا کہ اک مہینے وچ 904 ملین یونٹاں دی اوور بلنگ سامنے آئی اے۔ جے ایہ اوور بلنگ پھڑی گئی اے تاں پتہ نہیں ہر مہینے کتنے صارفین ایس دا شکار ہوندے ہون گے۔ گھٹ آمدن والے صارفین نوں لَکھاں روپیاں دے بل بھیجے جاندے نے، حتٰی کہ لوک اپنی دھیاں دی ویلاہ (شادی) لئی رکھیا سونا ویچ کے بجلی دے بل بھرن تے مجبور ہو جاندے نے۔ آڈٹ حکام نے دَسیا کہ اوور بلنگ دے پیسے صرف اوہناں صارفین نوں واپس کیتے جاندے نے جیہڑے شکایت درج کرواؤندے نے۔ تھلوا عملہ (لوئر سٹاف) بجلی چوری تے لائن لاسز چھپاؤن لئی اوور بلنگ کردا اے۔

اجلاس دے شروع وچ سینیٹر سلیم مانڈوی والا نے کہیا کہ ذیلی کمیٹیاں دے اجلاساں وچ اداریاں دے پرنسپل اکاؤنٹنگ افسران شریک نہیں ہوندے۔ ایس تے چیئرپرسن شاہدہ بیگم نے ہدایت کیتی کہ اگوں توں پی اے سی یا ذیلی کمیٹیاں دے اجلاس پرنسپل اکاؤنٹنگ افسران دی غیر موجودگی وچ نہیں ہون گے۔ کمیٹی نے ایس معاملے تے وزیراعظم نوں خط لکھن دا وی فیصلہ کیتا۔ پاور ڈویژن دی آڈٹ رپورٹ دا جائزہ لیندیاں پی اے سی نے ترقیاتی بجٹ دے 1.2 ارب روپے ضائع (لیپس) ہون تے غصے دا اظہار کردیاں ایس نوں ماڑا مالی نظام قرار دتا۔ کمیٹی نے ڈیرہ بگٹی نوں بجلی دی فراہمی دے منصوبے لئی فنڈز جاری نہ ہون تے وی فکر مندی ظاہر کیتی۔

سینیٹر سلیم مانڈوی والا نے کہیا کہ ویہہ سالاں توں سمارٹ میٹر لاؤن دیاں گلاں ہو رہیاں نے۔ ایس تے سیکرٹری پاور ڈویژن نے دَسیا کہ آئیسکو وچ دس لَکھ سمارٹ میٹر لائے جا چکے نے۔ سی ای او لیسکو نے کہیا کہ لیسکو وچ اوور بلنگ صفر ہو چکی اے، رینجرز دی مدد نال بجلی چوری دے خلاف اثر دار کارروائیاں کیتیاں گئیاں تے پہلی وار اک ایکسین تے ست ایس ڈی اوز نوں نوکری توں کڈھ دتا گیا۔ سیکرٹری پاور ڈویژن دے مطابق لیسکو دے لائن لاسز دو سال پہلے 80 ارب روپے سن جیہڑے پچھلے سال گھٹ کے 20 ارب روپے رہ گئے نے۔

سی ای او لیسکو نے دَسیا کہ ایہوجہے بجلی چور وی پھڑے گئے جیہڑے اک ڈیوائس دے ذریعے میٹر نوں سلیپ موڈ وچ لے جاندے سن۔ آڈٹ رپورٹ وچ حیسکو وچ گھوسٹ تے ریٹائرڈ ملازماں دیاں تنخواہواں دی مد وچ اک ارب 6 کروڑ روپے دی بے ضابطگیاں دا انکشاف وی ہویا جس وچ ڈی ڈی او، ایکسین تے سی ایف او آفس دی ملی بھگت سامنے آئی۔ سی ای او حیسکو نے دَسیا کہ چار ملازم نوکری توں کڈھے جا چکے نے جد کہ ایف آئی اے نے پنج مقدمے درج کیتے نے۔ حکام دے مطابق کیس وچ 130 توں ودھ بندے ملوث نے تے ہن تک 13 کروڑ روپے دی ریکوری کیتی جا چکی اے۔