بھارت ولوں پانی چھڈن دی کوئی اطلاع نہیں، ہڑھ (سیلاب) دی حالت بارشاں پاروں اے : انڈس واٹر کمشنر
بھارت فلڈ ڈیٹا نہیں دے رہیا، اپنے ذرائع توں پانی دی حالت تے نظر رکھی ہوئی اے: سیکرٹری آبی وسائل دی کمیٹی نوں بریفنگ؛ کل تک ہور بارشاں دی پیش گوئی، پنجاب تے سندھ دے سیکرٹریز ایریگیشن تے محکمہ موسمیات دے افسراں دی عدم شرکت تے کمیٹی غصے وچ
اسلام آباد (سہیل خان) سینیٹ دی قائمہ کمیٹی برائے آبی وسائل دا اجلاس چیئرمین سینیٹر جام سیف اللہ خان دی صدارت تھلے ہویا جس وچ وفاقی فلڈ کمیشن نے دیس دی موجودہ ہڑھ (سیلاب) دی حالت تے مون سون دے دوران بچاء لئی کیتے گئے انتظاماں تے بریفنگ دتی۔ چیئرمین کمیٹی نے سیلاب نال نمٹن دیاں تیاریاں بارے پُچھیا جس تے سیکرٹری وزارتِ آبی وسائل نے دَسیا کہ بھارت ولوں سندھ طاس معاہدہ معطل ہون پاروں فلڈ ڈیٹا نہیں دتا جا رہیا، پر پاکستان اپنے ذرائع توں پانی دی حالت دی لگی تار نگرانی کر رہیا اے۔ انڈس واٹر کمشنر نے صاف کیتا کہ بھارت ولوں پانی چھڈن دی کوئی اطلاع نہیں، موجودہ سیلابی حالت صرف بارشاں کر کے اے۔
فلڈ کمیشن نے دَسیا کہ دریائے چناب وچ قادر آباد تے تریموں دے تھاں تے ہائی فلڈ (وڈا ہڑھ) جد کہ تربیلا، چشمہ تے نوشہرہ دے تھاواں تے نچلے درجے دا سیلاب اے۔ زیادہ تر دریاواں تے بیراجاں تے پانی دا وہاء معمول مطابق اے۔ حکام دے مطابق بھارت دے تھین، پونگ تے بھاکڑا ڈیم ہلے وی ادھے توں گھٹ یا ادھے بھرے ہوئے نے۔ بریفنگ وچ دَسیا گیا کہ 2 توں 20 جولائی دے دوران گلگت بلتستان، چترال، غذر، اپر دیر، خیبر، شانگلہ، مردان، باجوڑ، سیالکوٹ، اٹک، ڈی جی خان، لیاقت پور تے تیمرگرہ وچ فلیش فلڈ، گلیشیئر جھیل پھٹن، کلاؤڈ برسٹ تے دریائی کٹاؤ دے کئی واقعات پیش آئے جد کہ 18 توں 25 جولائی دے دوران ہور تیز بارشاں دی پیش گوئی اے۔
کمیٹی نے پنجاب ایریگیشن دے چیف انجینئر دی ویڈیو لنک کے ذریعے شرکت تے محکمہ موسمیات دے افسراں دی عدم حاضری تے سخت غصے دا اظہار کیتا تے کارروائی دی تاڈ (انتباہ) جاری کردیاں اگلے اجلاس وچ متعلقہ سیکرٹریز تے افسراں دی آپ آ کے شرکت یقینی بناؤن دی ہدایت کیتی۔ این ڈی ایم اے نے دَسیا کہ مرالہ دے تھاں تے ہائی فلڈ اے تے دریاواں دے پینڈے (ریور بیڈ) اُچے ہون نال سیلاب دی شدت وچ وادھا ہویا اے جس تے نویں سٹڈی کیتی جاوے گی۔ حکام دے مطابق گلیشیئراں دی نگرانی لئی بنائے گئے ڈیش بورڈ توں ویلے سر وارننگ جاری کیتی جا رہی اے جد کہ دریائے ستلج تے چناب لئی 24 گھنٹے پہلے فلڈ فورکاسٹنگ دا نظام وی چالو اے۔
