لَکھ ٹن کنک دی خریداری ملّ تے لبھن نال مشروط
لَکھ ٹن کنک دی خریداری ملّ (قیمت) تے لبھن (دستیابی) نال مشروط؛ کنک دی دستیابی تے ملّ تے گل بات توں بعد معاملہ پنجاب کابینہ وچ پیش کیتا جاوے گا؛ خریداری نہ ہون نال پنجاب وچ کنک دا بحران، آٹا تے روٹی ہور مہنگی ہون دا خدشہ
لاہور (محمد حسن رضا توں، عمران اکبر) پنجاب حکومت نے کنک دیاں لوڑاں پوریاں کرن لئی پاسکو توں ہور اَٹھ لَکھ میٹرک ٹن کنک خریدن دا فیصلہ کردیاں وفاقی وزارتِ قومی غذائی تحفظ و تحقیق توں کنک دی دستیابی تے ملّ دی تفصیلاں منگ لئیاں نے۔ محکمہ خوراک و تحفظِ صارفین پنجاب ولوں 21 جولائی 2026 نوں وفاقی سیکرٹری وزارتِ قومی غذائی تحفظ و تحقیق نوں لکھے گئے چٹھی (مراسلے) مطابق پنجاب حکومت نے پہلے توں منظور شدہ دو لَکھ میٹرک ٹن توں علاوہ ہور اَٹھ لَکھ میٹرک ٹن کنک پاسکو توں لین دی درخواست کیتی اے۔
چٹھی وچ کہیا گیا اے کہ ہور 8 لَکھ میٹرک ٹن کنک دی خریداری بارے وفاقی وزارتِ قومی غذائی تحفظ و تحقیق نے ایس موڑ تے کنک دی عدم دستیابی ول اشارہ کیتا اے۔ ایس دے باوجود پنجاب حکومت نے متعلقہ وفاقی وزارت نوں ہدایت کیتی اے کہ اوہ کنک دی دستیابی تے ملّ طے کرن لئی گل بات کرے۔ پنجاب حکومت نے وفاق توں دو بنیادی معلومات ترت (فوری طور تے) منگیاں نے۔ پہلی ایہ کہ مالی سال 2026-27 دے دوران پاسکو کول پنجاب نوں دین لئی 8 لَکھ میٹرک ٹن کنک ہے یا نہیں، جد کہ دوجی ایہ کہ ایس کنک دی فی 40 کلوگرام قیمت (ملّ) کیہ ہووے گی۔
چٹھی وچ صاف کیتا گیا اے کہ کنک دی دستیابی تے ملّ تے گل بات پوری ہون توں بعد معاملہ حتمی منظوری لئی موڑ کے پنجاب کابینہ اگے رکھیا جاوے گا۔ ایس توں ظاہر ہوندا اے کہ وادھو 8 لَکھ میٹرک ٹن کنک دی خریداری ہلے ملّ تے دستیابی نال مشروط اے۔ ایس سارے وچالے ذرائع مطابق محکمہ خوراک پنجاب نے 30 لَکھ میٹرک ٹن کنک خریداری دا ہدف رکھیا سی پر صرف 4 لَکھ 80 ہزار میٹرک ٹن کنک خریدی گئی، کنک خریداری نہ ہون نال پنجاب وچ کنک دے بحران دا خدشہ اے، جس نال آٹا تے روٹی ہور مہنگی ہون دا خطرہ بن گیا اے۔
پنجاب حکومت نے پاسکو توں 8 لَکھ میٹرک ٹن کنک خریدن دی منظوری دتی، 21 جولائی نوں ڈی جی فوڈ امجد حفیظ نے ایم ڈی پاسکو نوں چٹھی لکھی کہ صفر اشاریہ 2 ملین ٹن کنک دی خریداری دی منظوری پہلے دتی جا چکی اے۔ چٹھی دے مضمون مطابق ایس ویلے پنجاب کول کنک دے ذخائر منگ (طلب) مطابق موجود نہیں، پنجاب نے پاسکو توں کنک دی ڈلیوری دا ویلا 4 مہینیاں وچ پورا کرن دی درخواست کیتی اے۔
