پنجاب: سرکاری ملازماں دیاں بنیادی تنخواہاں، الاؤنسز، پنشن وچ وادھا
بیسک پے سکیل 2026 نافذ، یکم جولائی توں لاگو، تنخواہاں نویں پے سکیل وچ منتقل، پنشن وچ 3 اشاریہ 5 فیصد وادھا، الاؤنس بنیادی تنخواہ دے 100 فیصد دے برابر برقرار
لاہور (اپنے نامہ نگار توں) پنجاب حکومت نے سرکاری ملازماں تے پنشنراں لئی تن اہم نوٹیفکیشن جاری کردیاں مختلف الاؤنسز، بنیادی تنخواہاں تے پنشن وچ وادھا کر دتا، پنجاب سول سیکرٹریٹ، گورنر ہاؤس، سول سیکرٹریٹ، وزیراعلیٰ آفس دے افسراں تے ملازماں لئی سیکرٹریٹ الاؤنس بنیادی تنخواہ دے 100 فیصد دے برابر برقرار رکھیا گیا اے پر ہن ایس دا حساب بیسک پے سکیل 2026 مطابق کیتا جاوے گا، یکم جولائی 2026 توں سرکاری ملازماں نوں 7 فیصد ایڈہاک ریلیف الاؤنس 2026 دتا جاوے گا، مختلف گریڈاں دا خصوصی کنوینس الاؤنس 6 ہزار توں ودھا کے 10 ہزار روپے مہینہ کر دتا گیا اے، پنجاب سول سیکرٹریٹ، گورنر ہاؤس، سیکرٹریٹ تے چیف منسٹر آفس دے اہل ملازماں لئی سول سیکرٹریٹ الاؤنس نویں بنیادی پے سکیل 2026 مطابق بنیادی تنخواہ دے 100 فیصد دے برابر برقرار رکھیا گیا اے، سارے موجودہ سول پنشنراں دی خالص پنشن وچ 3 اشاریہ 5 فیصد وادھا وی منظور کر لیا گیا اے۔
نوٹیفکیشن مطابق پنجاب حکومت نے بیسک پے سکیل 2022 دی تھاں بیسک پے سکیل 2026 نافذ کر دتے نے جیہناں دا اطلاق یکم جولائی 2026ء توں ہووے گا۔ موجودہ ملازماں دیاں تنخواہاں پوائنٹ ٹو پوائنٹ بنیاد تے نویں پے سکیل وچ منتقل کیتیاں جان گیئاں یعنی جس سٹیج تے ملازم 30 جون 2026ء نوں موجود ہووے گا، جنہاں ملازماں نوں پرسنل پے مل رہی اے اوہ وی نویں سکیل وچ برقرار رہے گی۔ نوٹیفکیشن وچ صاف کیتا گیا اے کہ سالانہ انکریمنٹ دا نظام بدستور برقرار رہے گا تے نویں پے سکیل وچ منتقل ہون والے موجودہ ملازماں نوں پہلی سالانہ انکریمنٹ یکم دسمبر 2026ء نوں ملے گی، محکمہ خزانہ نے 2022ء تے 2025ء دے ایڈہاک ریلیف الاؤنسز یکم جولائی 2026ء توں مکا (ختم کر) دتے جد کہ ایڈہاک ریلیف الاؤنس 2023 سابقہ منجمد سطح تے برقرار رہے گا، نویں بھرتی ہون والے ملازماں نوں وی 2023ء دا الاؤنس بی ایس 1 توں 16 لئی بنیادی تنخواہ 2022 دے 35 فیصد تے بی ایس 17 توں 22 لئی 30 فیصد دے حساب نال نوٹیشنل بنیاد تے دتا جاوے گا، ایسے طرحں ایڈہاک ریلیف الاؤنس 2024 وی منجمد سطح تے برقرار رہے گا جد کہ نویں ملازماں نوں بی ایس 1 توں 16 لئی 25 فیصد تے بی ایس 17 توں 22 لئی 20 فیصد نوٹیشنل بنیاد تے دتا جاوے گا۔
یکم جولائی 2026ء توں سارے اہل سرکاری ملازماں لئی ایڈہاک ریلیف الاؤنس 2026 بنیادی تنخواہ 2026 دا 7 فیصد مقرر کیتا گیا اے۔ ایہ الاؤنس صرف باقاعدہ تے کنٹریکٹ ملازم جیہڑے ریگولر پے سکیل تے کم کر رہے نے اوہناں نوں ملے گا، ایہ انکم ٹیکس دے دائرے وچ ہووے گا، چھٹی (رخصت) دے دوران وی قابلِ ادائیگی ہووے گا، تاہم غیر معمولی چھٹی دے دوران نہیں ملے گا۔ ایہ پنشن، گریجویٹی، ہاؤس رینٹ یا دوجے واجبات دی کیلکولیشن دا حصّہ نہیں ہووے گا۔ باہرلے ملک تعینات ملازماں نوں ایہ الاؤنس نہیں ملے گا، البتہ باہرلے ملک توں موڑ کے آؤن والے ملازماں نوں مقررہ شرطاں مطابق ادا کیتا جاوے گا۔ معطلی دے دوران وی ایہ قابلِ ادائیگی ہووے گا، نوٹیفکیشن مطابق بیسک پے وچ سالانہ انکریمنٹ دی بنیاد تے ملن والی پرسنل پے وی شامل سمجھی جاوے گی۔ نوٹیفکیشن وچ ہور کہیا گیا اے کہ جنہاں خصوصی الاؤنسز تے سپیشل پیز دا تعلق بنیادی تنخواہ نال اے، اوہ نویں بیسک پے سکیل 2026 مطابق آپو آپ (خودکار طور تے) ودھ جان گے تاہم جنہاں الاؤنسز وچ کسی مخصوص پے سکیل دا واضح ذکر موجود اے، اوہناں وچ حکومت دی وکھری منظوری توں بغیر کوئی وادھا نہیں ہووے گا۔ کنوینس الاؤنس وچ وی وڈا وادھا کیتا گیا اے۔
بی ایس 1 توں 4 دا کنوینس الاؤنس 1785 توں ودھا کے 2678 روپے، بی ایس 5 توں 10 دا 1932 توں 2898 روپے، بی ایس 11 توں 15 دا 2856 توں 4284 روپے جد کہ بی ایس 16 تے ایس توں اُپر دے ملازماں دا کنوینس الاؤنس 5000 توں ودھا کے 7500 روپے مہینہ کر دتا گیا اے۔ معذور ملازماں لئی خصوصی کنوینس الاؤنس 6 ہزار توں ودھا کے 10 ہزار روپے مہینہ کر دتا گیا اے جد کہ دوجیاں ساریاں شرطاں برقرار رہن گی۔ محکمہ خزانہ نے موجودہ سرکاری ملازماں نوں اختیار دتا اے کہ اوہ نوٹیفکیشن جاری ہون دے 30 دناں دے اندر تحریری طور تے ناپچھتاؤن جوگ (ناقابلِ واپسی) آپشن ورتدیاں بیسک پے سکیل 2022 یا بیسک پے سکیل 2026 وچوں کسی ایک دے تحت تنخواہ وصول کرن دی چون (انتخاب) کر سکدے نے۔ مقررہ ویلے وچ آپشن نہ دین والے ملازماں نوں آپو آپ بیسک پے سکیل 2026 دی چون کرن والا سمجھیا جاوے گا۔
نوٹیفکیشن مطابق نفاذ دے دوران سامنے آؤن والیاں بے ضابطگیاں یا مسئلیاں دے حل لئی محکمہ خزانہ وچ کمیٹی وی بنائی جاوے گی۔ دوجے نوٹیفکیشن تحت پنجاب حکومت نے موجودہ سول پنشنراں دی خالص پنشن وچ 3 اشاریہ 5 فیصد وادھا منظور کیتا اے جس دا اطلاق وی یکم جولائی 2026 توں ہووے گا۔ ایہ وادھا اوہناں ملازماں تے لاگو نہیں ہووے گا جیہڑے یکم جولائی 2026 یا ایس توں بعد ریٹائر ہون گے۔ خاندانی پنشن، کمپیشنٹ الاؤنس تے باہرلے ملک رہن والے اہل پنشنر وی مقررہ شرطاں مطابق ایس وادھے توں فائدہ چک سکن گے تاہم سپیشل ایڈیشنل پنشن دی صورت وچ ایہ وادھا قابلِ ادائیگی نہیں ہووے گا۔ تریجے نوٹیفکیشن مطابق پنجاب سول سیکرٹریٹ، گورنر ہاؤس، سیکرٹریٹ تے چیف منسٹر آفس دے اوہناں ملازماں لئی جیہڑے متعلقہ اداریاں دے پے رول تے نے، سول سیکرٹریٹ الاؤنس بنیادی تنخواہ دے 100 فیصد دے برابر برقرار رکھیا گیا اے پر ہن ایس دا حساب بیسک پے سکیل 2026 مطابق کیتا جاوے گا۔
