اندراجِ مقدمہ دیاں درخواستاں دی منتقلی سیشن جج دا اختیار نہیں: ہائیکورٹ

سیشن جج اوکاڑا دا حکم دائرہ اختیار توں باہر، کالعدم قرار؛ گرفتاری توں پہلاں ضمانت دیاں درخاستاں دی منتقلی قانون دے مطابق: جسٹس فاروق حیدر

لاہور (کورٹ رپورٹر) لاہور ہائی کورٹ نے اک اہ‏م فیصلے وچ کہیا اے کہ سیشن جج نوں فوجداری ضابطے دی دفعہ 22-اے تحت پرچہ درج کروان دی درخاست اک جسٹس آف دی پیس توں دوجے جسٹس آف دی پیس ول منتقل کرن دا اختیار حاصل نہیں، پر غیر معمولی حالات وچ گرفتاری توں پہلاں ضمانت دیاں درخاستاں نوں منتقل کرن دا اختیار برقرار رہے گا۔ جسٹس فاروق حیدر نے درخاست گزار فیصل منظور ولوں سیشن جج اوکاڑا دے حکم خلاف دائر آئینی درخاست اُتے فیصلہ سنایا، جس وچ سیشن جج دے حکم نوں جزوی طور تے کالعدم قرار دتا گیا۔

عدالت نے اپنے فیصلے وچ کہیا کہ سیشن جج دا دفعہ 22-اے تحت پرچہ درج کروان دی درخاست نوں منتقل کرن دا حکم دائرہ اختیار توں وادھو سی، ایس لئی ایہنو کینسل (کالعدم) کیتا جاندا اے۔ عدالت نے صاف کیتا کہ اجہیاں درخاستاں نوں منتقل کرن دا اختیار صرف لاہور ہائی کورٹ نوں آئین دے آرٹیکل 199 تحت حاصل اے، سیشن جج نوں نہیں۔ فیصلے وچ ایہہ وی کہیا گیا کہ دوجے پاسے گرفتاری توں پہلاں ضمانت دیاں درخاستاں نوں منتقل کرن دے حوالے نال سیشن جج دا اختیار قانون دے مطابق اے، ایس لئی ایس حصے نوں برقرار رکھیا جاندا اے۔ عدالت نے قرار دتا کہ غیر معمولی حالات وچ صاف شفاف انصاف نوں یقینی بناؤن لئی ضمانت دیاں درخاستاں دی منتقلی دا حکم ٹھیک سی۔ فیصلے وچ ایس منے ہوئے اصول نوں وی دہرایا گیا کہ انصاف صرف ہونا ہی نہیں چاہیدا بلکہ ہندا ہویا وی نظر آؤنا چاہیدا اے۔