جسٹس محمود دا انصاف دی فراہمی وچ وڈا کردار، چیف جسٹس

عدالتی زندگی ایمانداری، قابلیت تے قانون دی بالادستی دا نمونہ: جسٹس ظفر راجپوت؛ ریٹائرمنٹ دے موقعے تے فل کورٹ ریفرنس، حسیب جمالی تے عامر نواز وڑائچ دا وی خطاب

کراچی (سٹاف رپورٹر) سندھ ہائی کورٹ وچ جسٹس محمود اے خان دی ریٹائرمنٹ دے موقعے تے فل کورٹ ریفرنس ہویا جس وچ چیف جسٹس ظفر احمد راجپوت، ہائی کورٹ دے ججز، بار ایسوسی ایشنز دے عہدے داراں، سینئر وکیلاں تے عدالتی افسراں نے شرکت کیتی۔ جسٹس محمود اے خان دی ریٹائرمنٹ توں بعد سندھ ہائی کورٹ وچ مستقل ججاں دی تعداد 30 رہ گئی جدکہ ایڈیشنل جج جسٹس فیض الحسن شاہ دی ملازمت دی مدّت 28 جولائی نوں ختم ہو رہی اے۔ فل کورٹ ریفرنس نال خطاب کردیاں چیف جسٹس ظفر احمد راجپوت نے کہیا کہ جسٹس محمود اے خان نے اپنے عدالتی فرائض ہمیشاں آئین تے قانون دے مطابق پورے کیتے۔ فل کورٹ ریفرنس صرف اک رسمی تقریب نہیں بلکہ ایک اجہے جج دیاں خدمات نوں منن دا اظہار اے جس نے عدلیہ دے وقار تے انصاف دی فراہمی وچ وڈا کردار ادا کیتا۔

چیف جسٹس نے کہیا کہ جسٹس محمود اے خان نے بطور جج 11 ہزار مقدمے نمٹائے۔ اوہناں دی عدالتی زندگی ایمانداری، قابلیت تے قانون دی بالادستی دا نمونہ رہی۔ ریٹائر ہون والے جسٹس محمود اے خان نے اپنے خطاب وچ چیف جسٹس، ساتھی ججاں، وکیلاں، عدالتی عملے تے اپنے گھر والیاں دا شکریہ ادا کردیاں کہیا کہ اوہناں دی کامیابی گھر والیاں، برادر ججاں، سٹاف تے وکیلاں دے ساتھ توں بغیر ممکنا نہیں سی۔ فل کورٹ ریفرنس نال سندھ ہائی کورٹ بار ایسوسی ایشن دے صدر حسیب جمالی نے جسٹس محمود اے خان دیاں پیشہ ورانہ خدمات نوں خراجِ تحسین پیش کردیاں کہیا کہ اوہ 1994ء وچ ڈسٹرکٹ کورٹس وچ بطور وکیل رجسٹرڈ ہوئے تے عدالتی نظام وچ نمایاں خدمات انجام دتیاں۔ کراچی بار ایسوسی ایشن دے صدر عامر نواز وڑائچ نے کہیا کہ جسٹس محمود اے خان نے بطور جج انصاف دی فراہمی لئی ملّوانیاں خدمات انجام دتیاں، امید اے اوہ آئندہ وی قانون تے انصاف دے شعبے وچ اپنا مثبت کردار ادا کردے رہن گے۔