آف لوڈ کراچی ہوئے تے اتھے کیوں آ گئے؟ اسلام آباد ہائیکورٹ۔

شہری دی درخواست دائرہ اختیار نہ ہون تے خارج، متعلقہ فورم نال رابطہ کرن دی ہدایت۔

اسلام آباد (رضوان قاضی) اسلام آباد ہائیکورٹ نے شہری نوں وجہ دسے بغیر کراچی ایئرپورٹ توں آف لوڈ کرن دے خلاف دائر درخواست خارج کردے ہوئے متعلقہ فورم نال رابطہ کرن دی ہدایت کر دتی، شہری فیصل نواز دی درخواست تے سماعت دے دوران وکیل نے موقف اختیار کیتا کہ 9 جولائی نوں کراچی توں سعودی عرب روانہ ہونا سی، ورک ویزہ، پروٹیکٹر، کارآمد پاسپورٹ، ہوائی ٹکٹ سمیت سائیاں ضروری دستاویزاں موجود سن، کراچی دے جناح ایئرپورٹ توں بغیر وجہ دسے آف لوڈ کر دتا گیا، جسٹس اعظم خان نے کیہا بندہ کراچی توں آف لوڈ ہویا اے تے تسیں اسلام آباد ہائیکورٹ کیوں آ گئے او؟، پورے پاکستان توں کوئی وی آف لوڈ ہووے گا تے وہ اسلام آباد ہائیکورٹ پہنچ جائے گا، عدالت نے دائرہ اختیار نہ ہون دی بنیاد تے درخواست خارج کر دتی۔