ٹانک وچ چیک پوسٹ اُتے حملہ، سکیورٹی فورسز نے فتنۃ الخوارج دے ناپاک ارادے ناكام بنا دتے: 12 دہشت گرد ہلاک، 12 فوجیاں سمیت 15 شہید
جواناں نے غیر معمولی دلیرے، پیشہ ورانہ مہارت نال مقابلہ کیتا، شدید دباؤ دا شکار حملہ آوراں نے بارود نال بھری گڈی ٹکرا دتی جس نال دھماکا ہویا؛ شہدا وچ پولیس دے 2، جنگلات دا اک اہلکار وی شامل؛ مستونگ، بنوں وچ فورسز دے آپریشنز، 4، 4 دہشت گرد مارے گئے؛ کوہاٹ ٹول پلازہ دے نیڑے ایکسائز اہلکاراں اُتے حملہ، کسٹمز انفورسمنٹ سکواڈ دے اے ایس آئی سمیت 2 اہلکار شہید؛ صدر، وزیراعظم دی مذمت
راولپنڈی، اسلام آباد (خصوصی نیوز رپورٹر، نیوز ایجنسیاں) خیبر پختونخوا دے ضلع ٹانک وچ چیک پوسٹ اُتے حملہ، سکیورٹی فورسز نے فتنۃ الخوارج دے ناپاک ارادے ناکام بناؤندیاں ہویاں 12 دہشت گرد ہلاک کر دتے، ایس دوران بارود نال بھری گڈی پوسٹ دی باہری کندھ نال ٹکراؤن دے نتیجے وچ دھماکے نال 12 فوجیاں سمیت 15 شہید ہو گئے۔ پاک فوج دے محکمہ تعلقات عامہ (آئی ایس پی آر) دے مطابق فتنۃ الخوارج دے دہشت گرداں نے ٹانک وچ جوائنٹ پولیس چیک پوسٹ اُتے بزدلانہ حملہ کیتا، پر سکیورٹی فورسز دی ویلے سر تے اثر دار کارروائی نے دہشت گرداں دے ناپاک ارادے ناکام بنا دتے۔ جواناں نے غیر معمولی دلیرے، پیشہ ورانہ مہارت نال نسن والے 12 خوارج نوں ہلاک کر دتا۔ شدید دباؤ دا شکار حملہ آوراں نے بارود نال بھری گڈی چیک پوسٹ دی باہری کندھ نال ٹکرائی جس دے نتیجے وچ ہون والے دھماکے پاروں چیک پوسٹ دے بنیادی ڈھانچے نوں شدید نقصان پہنچیا اے۔ آئی ایس پی آر دے مطابق دھماکے دے نتیجے وچ وطن دے 15 بہادر سپوت شہید ہو گئے، شہدا وچ 12 فوجی جوان، 2 پولیس اہلکار تے محکمہ جنگلات دا اک سرکاری اہلکار شامل ہن۔ آئی ایس پی آر نے کہیا کہ علاقے وچ ہور کسی وی دہشت گرد دی موجودگی دے خاتمے لئی کلیئرنس آپریشن جاری اے، دہشت گردی دے خلاف بھرپور کارروائیاں بغیر کسی رکاوٹ دے جاری رہن گیاں، باہرلی سرپرستی وچ ہون والی دہشت گردی دا مکمل خاتمہ یقینی بنایا جائے گا۔
ساڈے بہادر شہدا دیاں عظیم قربانیاں وطن دے دفاع، قومی سلامتی دے تحفظ دے عزم نوں ہور مضبوط کردیاں ہن۔ ایسے دوران بنوں پولیس تے سکیورٹی فورسز نے پہاڑی سلسلے تلگئی وچ سانجھے آپریشن دے دوران 4 دہشت گرد ہلاک تے 5 مشتبہ بندے گرفتار کر لائے، فائرنگ دے تبادلے وچ 2 پولیس اہلکار ایس ایچ او تھانہ بسیہ خیل راشد خان تے کانسٹیبل واجد خان زخمی ہوئے جنہاں نوں ہسپتال منتقل کر دتا گیا۔ ہلاک دہشت گرداں دے قبضے توں دو کلاشنکوفاں، اک رائفل تے ہور اسلحہ و سامان برآمد کر لیا گیا۔ ادھر سکیورٹی فورسز نے آپریشن العزم دے تحت بلوچستان وچ مستونگ دے علاقے کھڈ کوچہ وچ کامیاب کارروائی کردیاں ہویاں فتنۃ ہندوستان دے 4 دہشت گرد ہلاک کر دتے، ہلاک دہشت گرداں توں بھاری مقدار وچ اسلحہ تے گولا بارود برآمد ہویا، جدکہ ورتوں وچ آؤن والیاں موٹرسائیکلاں وی ضبط کر لئیاں گئیاں۔ ایہدے توں علاوہ خیبر پختونخوا دے کوہاٹ ٹول پلازہ دے نیڑے دہشت گرداں نے ایکسائز اہلکاراں اُتے حملہ کر دتا، جس دے نتیجے وچ کسٹمز انفورسمنٹ سکواڈ دے اسسٹنٹ سب انسپکٹر (اے ایس آئی) ساجد الاسلام تے سپاہی جواد شہید ہو گئے، جدکہ کسٹمز دا اک سپاہی زخمی ہو گیا۔ صدر آصف علی زرداری تے وزیراعظم شہباز شریف نے واقعے دی مذمت کردیاں کہیا کہ دہشت گرداں نوں قانون دے کٹہرے وچ لیا کے نشانِ عبرت بنایا جائے گا، دہشت گردی دے ناہنگ دے مکمل خاتمے تک ایہدے خلاف جنگ جاری رکھاں گے، شرپسند عنصراں نوں کسی صورت ملک دا امن تباہ نہیں کرن دیاں گے۔
