نیب نال متعلق سارے مقدمیاں دی سماعت وفاقی آئینی عدالت کرے گی: سپریم کورٹ نے فیصلہ سنا دتا

نیب مقدمے آئین دے آرٹیکل 175 اے تے 175 ایف تحت آئینی عدالت نوں منتقل ہوئے سمجھیا جائے گا، شق 32 تے 32 اے تحت سانوں سماعت دا اختیار نہیں: جسٹس محمد علی مظہر؛ بانی پی ٹی آئی نے وی ہائی کورٹ فیصلے خلاف سپریم کورٹ نال رجوع کیتا سی، رجسٹرار نے اعتراض نال درخاست واپس کر دتی، ہن ضمانت دی درخاست آئینی عدالت وچ ہی سنی جائے گی

اسلام آباد (کورٹ رپورٹر، مانیٹرنگ ڈیسک) سپریم کورٹ نے نیب کیسز نال متعلق اہم فیصلہ جاری کردیاں قرار دتا اے کہ نیب مقدمیاں وچ مرکزی اپیلاں تے ضمانت دیاں درخاستاں دی سماعت وفاقی آئینی عدالت کرے گی۔ جسٹس محمد علی مظہر نے مختصر فیصلہ عدالت وچ پڑھ کے سنایا، جس وچ کہیا گیا کہ نیب مقدمیاں دی سماعت دا اختیار سپریم کورٹ نوں حاصل نہیں۔ نیب قانون دی شق 32 تے 32 اے تحت سپریم کورٹ نوں ایہناں مقدمیاں دی سماعت دا اختیار نہیں دتا گیا، ایس لئی نیب کیسز وچ مرکزی اپیلاں تے ضمانت دیاں درخاستاں دی سماعت وفاقی آئینی عدالت وچ ہووے گی۔ فیصلے دے مطابق بانی پی ٹی آئی نے وی ہائی کورٹ دے ضمانت کیس دے خلاف سپریم کورٹ نال رجوع کیتا سی، پر رجسٹرار سپریم کورٹ نے درخاست اُتے اعتراضات لاؤندیاں ایہنو واپس کر دتا سی۔ ہن سپریم کورٹ دے فیصلے توں بعد بانی پی ٹی آئی دی ضمانت دی درخاست وفاقی آئینی عدالت وچ سنی جائے گی۔

عدالت نے ہور قرار دتا کہ نیب نال متعلق سارے مقدمے آئین دے آرٹیکل 175 اے تے 175 ایف تحت وفاقی آئینی عدالت نوں منتقل ہوئے سمجھیا جائے گا۔ واضح رہے کہ سپریم کورٹ وچ نیب دے اک زیرِ سماعت مقدمے دے دوران اختیارِ سماعت دا سوال چکیا گیا سی۔ نیب قانون وچ 5 مارچ 2026ء نوں ترمیم کیتی گئی سی، جس تحت شق 32 اے وچ اپیلاں دی سماعت دا اختیار وفاقی آئینی عدالت نوں منتقل کر دتا گیا سی۔ جسٹس محمد علی مظہر دی سربراہی وچ تن رکنی بینچ نے کیس دی سماعت کیتی۔ بینچ وچ جسٹس مسرت ہلالی تے جسٹس شاہد بلال حسن وی شامل سن۔ درخاست گزار دے وکیل عباد الرحمٰن لودھی نے ضمانت دا مقدمہ سپریم کورٹ وچ چلاؤن دے حق وچ دلیلاں دندیاں 18 مارچ 2026ء نوں نیب ترمیم توں بعد سپریم کورٹ ولوں دتی گئی اک ضمانت دا حوالہ دتا۔ دوجے پاسے اٹارنی جنرل منصور عثمان اعوان نے مؤقف اختیار کیتا کہ نیب اپیلاں تے ضمانت دے مقدمے وفاقی آئینی عدالت ہی وچ سنے جانے چاہیدے ہن کیونکہ کسی مقدمے دا اک حصہ سپریم کورٹ تے دوجا وفاقی آئینی عدالت وچ نہیں چلایا جا سکدا۔ نیب دے وکیل نے وی وفاقی حکومت دے مؤقف دی تائید کیتی سی۔ تن رکنی بینچ نے 16 جولائی نوں فیصلہ محفوظ کیتا سی۔