گھن گرج دس رہی، شیر آ نہیں رہا آ چکا اے: مریم نواز؛ کشمیر دی تقدیر بدلاں گے: نواز شریف
مخالفاں دیاں کانپاں ٹنگ رہیاں ہن، کشمیر وچ صرف نواز شریف حکومت دی کمی: وزیراعلیٰ؛ میرپور لئی 10 الیکٹرک بساں دا تحفہ؛ بلاول برخوردار! کشمیر نوں کشمور، میرپور نوں میرپور خاص نہ سمجھنا؛ وڈے منصوبیاں تے ن لیگ دی مہر نظر آئے گی: قائد ن لیگ دا خطاب
مظفرآباد، لاہور (بیورو رپورٹ، نیوز ایجنسیاں، مانیٹرنگ ڈیسک) وزیراعلیٰ پنجاب مریم نواز نے کہیا اے کہ جِنیاں خطرناک سازشاں نواز شریف خلاف ہوئیاں، جے عوام دی سپورٹ نہ ہوندی تاں ساڈا نام ختم ہو جانا سی۔ کشمیر وچ سبھ کچھ اے، اک ہی کمی اے کہ نواز شریف دی حکومت نہیں، مخالفاں دیاں دوڑاں لگ گئیاں ہن تے کانپاں ٹنگ رہیاں ہن پر ہن کشمیر دے اصل وارث کشمیر آ گئے ہن۔ میرپور دی گھن گرج دس رہی اے شیر آ نہیں رہا شیر آ چکا اے، میں محاورتاً نہیں خون توں کشمیری ہاں، اجے الیکشن نہیں ہویا تے میں دس الیکٹرک بساں دا تحفہ میرپور لے کے آئی ہاں، انٹرنیشنل ایئرپورٹ بناؤن دا وعدہ کردی ہاں۔ میرپور آزاد کشمیر وچ انتخابی جلسے نال خطاب کردیاں اوہناں کہیا کہ جنی گرمی وچ اج میرپور وچ لوک جلسے وچ آئے ہن، پورے کشمیر وچ شیر کامیاب ہووے گا، میرپور والیاں دا جذبہ دس رہا اے آزاد کشمیر وچ شیر آ چکا اے، مظفرآباد وچ مینہہ (بارش) دے باوجود عوام ن لیگ دے جلسے وچ موجود رہے، اج میں میرپور نہیں باپ دادا دے گھر آئی ہاں۔ میرپور وچ چنگے گھر بنے ہوئے ہن پر افسوس سڑکاں ٹوٹیاں ہوئیاں ہن، ہن ویلا آ گیا اے کہ میرپور وچ وی ترقی دے چراغ بلن، نواز شریف نے گڈی وچ کئی واری کہیا کہ کتنا سوہنا خطہ اے، تواڈا جذبہ دس رہا اے کہ کشمیر دے اصل وارث کشمیر آ گئے ہن، چوناں (انتخابات) وچ بھرپور کامیابی حاصل کراں گے۔
کشمیر وچ وسائل تے جذبے دی کمی نہیں، بہترین انفراسٹرکچر دی کمی اے، آزاد کشمیر وچ سیر سپاٹے (سیاحت) نال ترقی تے ہر اوکڑ حل ہو سکدی اے۔ آزاد کشمیر نوں بہترین ہسپتالاں تے سڑکاں دی لوڑ اے، آزاد کشمیر وچ ساڈی کچھ چِر لئی حکومت سی، تنقید کرنا سؤکھا ہوندا اے، ن لیگ توں بغیر کوئی جماعت دس دیو جے کشمیر وچ اک اِٹ وی لائی ہووے، جو سہولتاں اساں پنجاب وچ دے رہے ہاں الیکشن جِت کے آزاد کشمیر وچ وی دیاں گے، ایمانداری نال کم کیتا جائے تاں آزاد کشمیر 5 سال وچ پنجاب توں اگے نکل سکدا اے، آزاد کشمیر وچ سیف سٹی تے ‘اپنی چھت اپنا گھر’ منصوبہ ہونا چاہیدا اے، سوچ سمجھ کے ووٹ دیو کہیں ایویں نہ ہووے کہ پھر ترقی نوں ترس جاؤ، دوجے صوبیاں دے لوک کہندے ہن پنجاب دی وزیراعلیٰ سانوں دے دیو، کی پنجاب دے لوکاں نے کدی کہیا اے کہ دوجے صوبے دا وزیراعلیٰ سانوں دیو؟
ایس دوران مسلم لیگ (ن) دے قائد تے سابق وزیراعظم نواز شریف نے خطاب کردیاں کہیا کہ بلاول برخوردار! کشمیر نوں کشمور تے میرپور نوں میرپور خاص نہ سمجھنا، بلاول بھرا میری گل دا بُرا وی نہ منائیں، ایہہ نوک جھوک پارٹیاں وچ ہونی چاہیدی اے، مار کٹائی نہیں، آزاد کشمیر لئی میری حکومت توں بعد کسی وی حکومت نے کچھ نہیں کیتا تے موٹروے دا منصوبہ پورا نہیں کیتا، دسو (ن) لیگ توں بغیر کسی نے آزاد کشمیر لئی کچھ کیتا ہووے؟ اساں ایہہ قول قرار (عہد) لے کے آئے ہاں کہ میرپور تے آزاد کشمیر دی تقدیر بدل دیاں گے، تہانوں ہر وڈے ترقیاتی منصوبے تے ن لیگ دی مہر نظر آئے گی۔
میرپور اتنا سوہنا شہر اے پر جنا سوہنا ہونا چاہیدا سی اتنا نہیں اے تے اپنے دور دے میرے کم ادھورے پئے ہوئے ہن، پروان نہیں چڑھ سکے۔ میرے وزارتِ عظمیٰ توں جان توں بعد میں چُپ رہا پر کشمیر وچ کوئی ترقی نہیں ہوئی، میں ایہناں حکومتاں توں پچھنا چاہندا ہاں جو نواز شریف دی حکومت توں بعد آزاد کشمیر تے پاکستان وچ آئیاں، اوہناں نے آزاد کشمیر لئی کی کیتا اے، جے کچھ کیتا اے تاں مینوں دسو۔ کشمیر نوں اپنا گھر سمجھدا ہاں، کشمیر میرا پہلا گھر اے، مینوں لاہور وی پیارا اے تے کشمیر وی اتنا ہی پیارا اے، ساڈی پہلی ترجیح نوجواناں نوں تعلیم دینا اے، اتھے سکول تے یونیورسٹیاں بنن گیاں تے صحت تے خاص دھیان دتا جائے گا، مریم نواز پنجاب وچ دل تے کینسر دے ہسپتال بنا رہی اے، میں شہباز شریف تے مریم نوں کہاں گا کہ اتھوں دے ہر ہسپتال وچ وہی کچھ ہونا چاہیدا اے جو پنجاب وچ اے، ایہہ لوک علاج لئی اسلام آباد نہ جان۔ جو الیکٹرک بساں لاہور وچ چلدیاں ہن مریم نواز اتھے وی لے کے آئی اے، ‘ہسپتال آن ویلز’ وی آئیں گے، جے اتھے مسلم لیگ (ن) دی حکومت بندی اے تے مسلم لیگ (ن) دا وزیراعظم بنیدا اے تاں میں اوہدے نال آپ چل کے آزاد کشمیر دے چپّے چپّے جاواں گا تے اپنی نگرانی وچ کم کراواں گا تے منشور پورا ہووے گا
