صدرِ مملکت سے بلوچستان کے صوبائی وزراء کی ملاقات

بلوچستان دے عوام نوں بنیادی سہولتاں دی فراہمی پہلی ترجیح: زرداری؛ صدر دی وزراء نوں صوبے وچ جاری ترقیاتی منصوبیاں تے کم تیز کرن دی ہدایت

اسلام آباد (سٹاف رپورٹر) صدرِ مملکت آصف علی زرداری نال بلوچستان دے صوبائی وزراء نے بلاول ہاؤس اسلام آباد وچ ملاقات کیتی، ایس دوران بلوچستان وچ امن و امان، ترقیاتی منصوبیاں تے صوبے دی مجموعی صورتحال تے گل بات کیتی گئی۔ صدرِ مملکت نے بلوچستان وچ ترقی دے کم نوں ہور تیز کرن دی لوڑ تے زور دندیاں جاری ترقیاتی منصوبیاں تے پیش رفت تیز کرن دی ہدایت کیتی۔ اوہناں کہیا کہ بلوچستان دے عوام نوں بنیادی سہولتاں دی فراہمی تے صوبے دی ترقی حکومت دی پہلی ترجیح وچ شامل اے، بلوچستان دی ترقی، امن و امان دی صورتحال نوں بہتر کرن، عوامی بھلائی تے صوبے وچ معاشی سرگرمیاں نوں وادھا دین لئی سارے متعلقہ ادارے مل جل کے کم کرن۔ ملاقات کرن والیاں وچ بلوچستان دے وزیرِ منصوبہ بندی و ترقی ظہور بلیدی، وزیرِ صحت بخت محمد کاکڑ، وزیرِ لائیو سٹاک سردار فیصل جمالی، وزیرِ صنعت و تجارت سردار کویار ڈومکی، وزیرِ آبپاشی صادق عُمرانی، وزیرِ محنت سردار غلام رسول عُمرانی، پارلیمانی سیکرٹریز لیاقت لہڑی، سنجے کمار تے پاکستان پیپلز پارٹی بلوچستان دے سینئر نائب صدر میر علی حسن زہری شامل سن۔