اسلام آباد نئیں پنجاب، کشمیر دا فیصلہ کشمیریاں دا حق اے: بلاول

برابری دے حق لئی ۲۷ جولائی نوں تیر دے نشان اتے مہر لاؤ: ایکس تے پیغام نواز شریف صاحب دسو ووٹ نوں عزت کدوں دینی اے ؟: شرجیل میمن
اسلام آباد(نیوزایجنسیاں ،دنیانیوز)پاکستان پیپلز پارٹی دے چیئرمین بلاول بھٹو زرداری نے آکھیا اے کہ کشمیر دا فیصلہ صرف تے صرف کشمیر کرے گا، نہ اسلام آباد، نہ پنجاب، نہ سندھ، نہ بلوچستان تے نہ ہی خیبرپختونخوا اس دا فیصلہ کر سکدے نیں۔ سماجی رابطے دی ویب سائٹ ایکس تے اپنے پیغام وچ بلاول بھٹو زرداری نے آکھیا کہ کشمیر دے مستقبل دا فیصلہ صرف کشمیری عوام ہی کرن گے۔ انہاں نے آکھیا کہ برابری دے حق لئی ۲۷ جولائی نوں تیر دے نشان اتے مہر لگا کے پاکستان پیپلز پارٹی دے نامزد امیدواراں نوں کامیاب بناؤ تاں جو کشمیر دا فیصلہ صرف تے صرف کشمیر کرے۔ ادھر سندھ دے سینئر وزیر شرجیل انعام میمن نے سابق وزیراعظم نواز شریف دے بیان اتے ردعمل ڈیندیاں ہویاں آکھیا اے کہ مسلم لیگ (ن) خیراتی مینڈیٹ والی جماعت اے، اس دے منہ توں الیکشن تے ووٹاں دیتاں گلاں چنگیاں نئیں لگدیاں۔ اپنے بیان وچ شرجیل انعام میمن نے آکھیا کہ نواز شریف صاحب دسو کہ ووٹ نوں عزت کدوں دینی اے ؟ سیاست اپنی تھاں مگر سندھ تے کشمیر دی سرزمین و عوام نوں طنز و مزاح دا موضوع نہ بنایا جائے۔ انہاں نے آکھیا کہ سیاسی اختلاف اپنی تھاں، لیکن کسی وی صوبے ، شہر یا علاقے دی تضحیک کسی صورت قابل قبول نئیں، سابق وزیراعظم دا اے رویہ غیر سنجیدہ تے مضحکہ خیز اے۔ شرجیل میمن دا کہنا سی کہ نواز شریف دے بیان توں لکھاں پاکستانیاں، کشمیر تے سندھ دے عوام دے جذبات مجروح ہوئے نیں، کسی شہر یا ضلع دا ناں سیاسی تقریب وچ مذاق یا تقابل دے انداز وچ استعمال کرنا شعوری پسماندگی اے ۔