وزیراعلیٰ دی زیرِ نگرانی نکاسیِ آب دی 300 جدید کیمریاں نال مانیٹرنگ
400 کلومیٹر سیوریج لائن، سوا 700 کلومیٹر ڈرین تے سوا 2 لکھ مین ہولاں دی صفائی کر دتی گئی؛ مظفرآباد توں بعد مریم نواز دی ہدایت تے الیکٹرک بساں میرپور وی پہنچا دتیاں گئیاں، شہریاں دا جشن
لاہور (سٹاف رپورٹر) وزیراعلیٰ پنجاب مریم نواز دی زیرِ نگرانی صوبے دے 41 اضلاع وچ بارش دے پانی دی نکاسی، صفائی تے ریسکیو آپریشن جاری اے، آپریشن وچ لوکل گورنمنٹ، واسا، ستھرا پنجاب، ضلعی انتظامیہ سمیت دوجے متعلقہ محکمے حصہ لے رہے ہن، نکاسیِ آب دی 300 جدید کیمریاں دے ذریعے ڈیجیٹل مانیٹرنگ کیتی جا رہی اے، دوجے پاسے مظفرآباد توں بعد مریم نواز شریف دی ہدایت تے الیکٹرک بساں میرپور وی پہنچا دتیاں گئیاں۔ تفصیلات دے مطابق وزیراعلیٰ دی ہدایت تے لاہور سمیت دوجے شہراں وچ بارشاں دے پانی دی نکاسی لئی اک ہزار توں وادھ مشیناں تے ہزاراں واسا ورکر میدانِ عمل وچ ہن، لاہور سمیت دوجے شہراں وچ بارشاں دوران انڈر پاساں وچ کھلوتے بارشی پانی دی مانیٹرنگ لئی 24/7 ڈیجیٹل نگرانی کیتی جا رہی اے جدکہ پنجاب سیف سٹی اتھارٹی نال منسلک اے آئی بیسڈ سسٹم دے ذریعے کھلوتے بارشی پانی دی نشاندہی کیتی جا رہی اے، وزیراعلیٰ دی زیرِ نگرانی انتظامیہ، پی ڈی ایم اے، ریسکیو 1122 تے واسا دا مثالی اشتراکِ کار ویکھن نوں ملیا اے۔ وزیراعلیٰ دی ہدایت تے 400 کلومیٹر سیوریج لائن، سوا 700 کلومیٹر ڈرین تے سوا 2 لکھ مین ہولاں دی صفائی کر دتی گئی جس دے مثبت نتیجے سامنے آؤنا شروع ہو گئے ہن۔
نویں واسا ڈسٹرکٹس نوں ڈی واٹرنگ سیٹ، سکر مشیناں، سیور جیٹنگ مشیناں، ویل ایکسکویٹر، سیوریج ڈی سلٹنگ مشیناں، واٹر بروزرز تے کریناں فراہم کیتیاں گئیاں ہن، وزیراعلیٰ دی ہدایت تے ہر شہر وچ مون سون ایمرجنسی ریلیف کیمپ فعال ہن، اٹک، چکوال، مری، ڈی جی خان، راجن پور، گجرات تے دوجے شہراں، لاہور وچ ایم اے جناح روڈ، راوی روڈ سمیت مرکزی شاہراہاں فوری نکاسیِ آب نال صاف کر دتیاں گئیاں جدکہ سرگودھا، گوجرانوالہ، سیالکوٹ، سمبڑیال، پسرور، حافظ آباد وچ وی پانی دی فوری نکاسی توں بعد صفائی دا عمل وی مکمل کر لیا گیا جس تے عوام وزیراعلیٰ تے اوہناں دی ٹیم نوں خراجِ تحسین پیش کر رہے ہن۔ دوجے پاسے پاکستان مسلم لیگ (ن) دے صدر نواز شریف تے وزیراعلیٰ پنجاب مریم نواز شریف نے کچھ گھنٹیاں وچ وعدہ پورا کر دکھایا، وزیراعلیٰ پنجاب دی ہدایت تے الیکٹرک بساں میرپور پہنچ گئیاں، بساں میرپور پہنچن تے شہر وچ جشن دا سماں پیدا ہو گیا۔ میرپور دے رہائشی بزرگ، نوجوان، بچے خوشی نال نہال ہو کے بساں دے استقبال لئی پہنچ گئے، بساں نوں ڈھول وجاؤندیاں جلوس دی شکل وچ میرپور لایا گیا۔
