پٹرولیم مصنوعات نال مہنگائی وی بے لگام، ٹماٹر سمیت ساریاں سبزیاں پہنچ توں باہر
ٹماٹر 500، پیاز 110، مٹر 250، ٹینڈے 200، برائلر 600، وڈا گوشت 1800، کھلا دُدھ 240 روپے کلو تک پہنچ گیا؛ گھیو 610، چینی 150، دال ماش 480، دال مونگ 420، باسمتی چاول 400، سرھاں دا تیل 750 روپے کلو فروخت
اسلام آباد (سید قیصر شاہ) پٹرولیم مصنوعات دیاں قیمتاں وچ روزانہ دی بنیاد تے وادھے تے مہنگائی دے ہوش ربا طوفان نے تنخواہ دار تے سفید پوش طبقے دے ہوش اڈا دتے۔ مہنگائی دی شدت پاروں موسمی سبزیاں تے پھل وی عام بندے دی پہنچ توں باہر ہو گئے۔ ٹماٹر پہلی واری 500 روپے فی کلو تک پہنچ گیا جدکہ درجہ دوئم ٹماٹر 440 روپے فی کلو وسدا (فروخت) ہو رہا اے۔ پیاز 110 روپے، آلو 40 روپے، برائلر مرغی دا گوشت 600 روپے، بغیر ہڈی وڈا گوشت 1800 روپے تے چھوٹا گوشت 2800 روپے فی کلو فروخت کیتا جا رہا اے۔ ڈھابیاں، چھپر ہوٹلاں تے کھوکھیاں تے اک وقت دا سادہ کھانا (دال یا سبزی نال) 250 روپے توں گھٹ وچ دستیاب نہیں جدکہ سادہ چاہ 70 روپے تے دُدھ پتی 100 توں 120 روپے وچ وک رہی اے۔ لوڑ دیاں شیاں دیاں ودھدیاں قیمتاں نے عام بندے دی خریدن دی طاقت نوں بری طرحاں متاثر کیتا اے۔ گھریلو بجٹ درہم برہم ہو چکے ہن، تنخواہ کجھ ہی دہاڑیاں وچ مُک جاندی اے تے باقی مہینا ادھار لے کے لنگھاؤنا پیندا اے۔
جاویں جو آٹا، تندور دی روٹی تے کجھ سبزیاں، بشمول پیاز دیاں قیمتاں وچ کمی آئی اے پر زیادہ تر کھان پین دیاں شیاں مسلسل مہنگیاں ہو رہیاں ہن۔ پیکٹ دُدھ دا پاؤ 100 روپے، اک لیٹر پیکٹ دُدھ 380 روپے، کھلا تازہ دُدھ 240 روپے فی لیٹر، کھلا دہیں 260 روپے، چینی 150 روپے، گھیو 610 روپے، دال مسر 320 روپے، دال مونگ 420 روپے، دال ماش 480 روپے، دال چنا 300 روپے، چٹے چنے 320 روپے، باسمتی چاول 400 روپے، لال مرچ 800 روپے، ہلدی 800 روپے، سرھاں دا تیل 750 روپے، شکر 250 روپے، نہاؤن دا صابن 150 روپے، سرف 550 روپے فی کلو تے ہاف رول بسکٹ 40 روپے تک پہنچ چکا اے۔ سبزیاں وچ مٹر 250 روپے، ٹینڈے 200 روپے، کدو 140 روپے، بھنڈی 150 روپے، کریلا 140 روپے، ہری مرچ 120 روپے، شملہ مرچ 130 روپے، ادرک 650 روپے تے لہسن 400 روپے فی کلو وک رہا اے، جدکہ پھلاں وچ چٹا چونسہ درجہ اول 400 روپے، آڑو 300 روپے، خبانی درجہ اول 350 روپے تے جامن 400 روپے فی کلو مل رہے ہن۔ دوجے پاسے بجلی دے بھاری بلاں تے 200 یونٹاں دی حد نے شہریاں نوں روزانہ میٹر ویکھن تے مجبور کر دتا اے تاکہ مقررہ حد توں وادھا نہ ہووے۔ پبلک ٹرانسپورٹ دے کرایان وچ وی وادھا جاری اے جس پاروں عوام مہنگائی دے مسلسل دباؤ دا ساہمنا کر رہے ہن۔
