پاکستان: صرف سو ماہر نفسیات رجسٹرڈ، فی لکھ تے زیرہ عشاریہ صفر پنج دستیاب
ملک وچ سرکاری سطح تے ماہرینِ نفسیات دی قومی رجسٹری یا مرکزی ڈیٹا بیس موجود نہیں، ذہنی امراض دے صرف گیاراں مخصوص ہسپتال، بچیاں لئی صرف پنج مراکز، عالمی ادارہ صحت۔
اسلام آباد (نیوز رپورٹر) عالمی ادارہ صحت دی رپورٹ دے مطابق پاکستان وچ سرکاری سطح تے ماہرینِ نفسیات دی قومی رجسٹری یا مرکزی ڈیٹا بیس موجود نہیں۔ رپورٹ دے مطابق ملک دی باضابطہ ذہنی صحت دی افرادی قوت وچ صرف اک سو ماہرینِ نفسیات رجسٹرڈ نیں یعنی فی اک لکھ آبادی تے صرف زیرہ عشاریہ صفر پنج ماہرِ نفسیات دستیاب اے۔ عالمی بینک دے دو ہزار چوبیس دے تخمینے دے مطابق پاکستان دی آبادی پچی کروڑ توں تجاوز کر چکی اے جیدے بعد ایہ تناسب مزید گھٹ ہو کے زیرہ عشاریہ صفر چار رہ جاندا اے۔ غیر سرکاری اعداد و شمار دے مطابق ملک وچ ذہنی صحت دے شعبے نال جُڑے پیشہ ور افراد دی مجموعی تعداد باراں سو اے جیدے وچ تن سو ماہرینِ نفسیات، دو سو ذہنی صحت دیاں نرسیں تے چھ سو سوشل ورکرز شامل نیں۔ ماہرین دے مطابق ایہ تعداد وی اصل صورتحال دی مکمل عکاسی نہیں کردی کیونکہ ایدھے وچ نجی شعبے، این جی اوز تے تعلیمی اداریاں وچ خدمات انجام دین آلے گریجویٹس تے کونسلرز دا مکمل ریکارڈ شامل نہیں۔ ملک وچ ذہنی امراض لئی صرف گیاراں مخصوص ہسپتال نیں جدکہ عام ہسپتالاں وچ قائم نفسیاتی یونٹاں دی تعداد اٹھ سو دے نیڑے اے۔ ہسپتالاں نال جُڑے آؤٹ پیشنٹ سہولتاں تین ہزار سات سو انتاہلی تے کمیونٹی دی سطح تے قائم غیر ہسپتال مراکز چھ سو چوبیس نیں۔ بچیاں تے نویں جوآناں لئی صرف دو آؤٹ پیشنٹ تے تن ان پیشنٹ مراکز دستیاب نیں
