بلوچستان نوں امن دیولئی احتجاجی مظاہرے، ریلیاں تے جلسے
امن دی بگڑدی صورتحال تے مظاہرین دی پائیدار امن دے حق وچ نعرے بازی
کوئٹہ (سٹاف رپورٹر) امیر جماعت اسلامی بلوچستان و رکن صوبائی اسمبلی مولانا ہدایت الرحمن بلوچ دی اپیل اُتے جماعت اسلامی دے کوئٹہ اسلام آباد لانگ مارچ دی پہلی برسی دے موقعے اُتے صوبہ بھر وچ بدامنی، دہشت گردی، لاپتہ بندیاں، ٹارگٹ کلنگ تے امن و امان دی بگڑدی ہوئی صورتحال دے خلاف “بلوچستان نوں امن دیو” دے عنوان نال ضلعی ہیڈکوارٹرز، پریس کلباں تے عوامی جاہیں اُتے احتجاجی مظاہرے، ریلیاں تے جلسے منعقد کیتے گئے۔ مظاہرین نے حکومت، متعلقہ اداریاں تے سکیورٹی انتظامات دی ناکامی اُتے شدید احتجاج کردیاں ہویاں بلوچستان وچ پائیدار امن دے حق وچ نعرے لائے۔ خضدار، لورالائی، ژوب، مستونگ، لسبیلہ، ڈیرہ مراد جمالی، ڈیرہ اللہ یار، آواران، جھل مگسی، گنداواہ، جعفرآباد، صحبت پور، نصیرآباد تے دوجے ضلعےآں وچ منعقدہ احتجاجی اجتماعات توں نائب امیر جماعت اسلامی بلوچستان و امیر ضلع جعفرآباد پروفیسر مولانا محمد ایوب منصور، مولانا محمد اسلم، نورالدین غلزئی، عبدالحمید ناصر، حافظ خالد الرحمن شاہوانی، حافظ صفی اللہ شاہوانی، بشیر احمد ماندائی، فہد خان مندوخیل، محمد یونس، مولانا عبیداللہ ساسولی، فضل الرحمن لاشاری، عبدالصمد کھوسہ تے دوجے رہنماواں نے خطاب کیتا۔ مقررین نے آکھیا کہ بلوچستان دے لوک ہݨ بنیادی انسانی، آئینی، معاشی تے سیاسی حقاں توں وی ودھ کے صرف امن دا مطالبہ کر رہے نیں۔ افسوسناک گل اے کہ حکومتی نااہلی تے متعلقہ اداریاں دی ناکامی دی وجہ توں صوبہ لگاتار بدامنی دی لپیٹ وچ اے۔ جے حکمران جماعت اسلامی دے اک سال پہلے دے لانگ مارچ دے جائز مطالبے من لیندے تاں اڄ بلوچستان وچ امن ہوندا تے حالات اینے خراب نہ ہوندےـ ہݨ وی ویلا اے کہ حکومت جماعت اسلامی دے لانگ مارچ نال کیتے گئے وعدے پورے کرے۔
