مریم نواز دا راشن کارڈ دے ذریعے رجسٹرڈ ورکرز لئی 4.32 ارب دا اعلان
12 لکھ ورکرز نوں مریم نواز راشن کارڈ پروگرام تحت 28 ارب موصول، ایہناں سال رقم ودھا دِتی گئی، رجسٹرڈ ورکرز دی تعداد 14 لکھ توں ودھ ہو گئی، ہر مزدور، ہر کارکن دا مالی تحفظ ذمہ داری سمجھدی آں: وزیراعلیٰ۔
لاہور (سٹاف رپورٹر) وزیراعلیٰ مریم نواز شریف نے ورکرز لئی قابلِ تحسین اقدام کیتا اے۔ پنجاب وِچ 12 لکھ رجسٹرڈ ورکرز نوں مریم نواز راشن کارڈ دے ذریعے 28 ارب روپے مل گئے۔ وزیراعلیٰ مریم نواز شریف نے راشن کارڈ دے ذریعے رجسٹرڈ ورکرز نوں ایہناں سال 43.2 ارب روپے دین دا اعلان کیتا اے۔ پنجاب وِچ رجسٹرڈ ورکرز دی تعداد وِچ ریکارڈر اضافہ ہویا، تعداد 14,03,063 تک پہنچ گئی۔ 12,44,130 رجسٹرڈ ورکرز نوں مریم نواز راشن کارڈ مل گئے تے 4,984 دی پرنٹنگ جاری اے۔ رجسٹرڈ ورکرز پورے صوبے وِچ 62,000 دکاناں توں 3 ہزار ماہانہ دیاں ضروری شے واں لے رہے نے۔
وزیراعلیٰ نے مالی سال 2026-27 لئی راشن کارڈ پروگرام دی منظوری دے دِتی اے۔ “ستھرا پنجاب” دے اک لکھ توں ودھ ورکرز وی راشن کارڈ توں فائدہ چک رہے نے۔ مریم نواز نے پنجاب وِچ رجسٹرڈ ورکرز دی تعداد ودھان دی ہدایت کیتی اے۔ وزیراعلیٰ دی صدارت وِچ اجلاس ہویا۔ لیبر منسٹر منشا اللہ بٹ تے سیکرٹری دانش افضال نے تفصیلی بریفنگ دِتی۔ وزیراعلیٰ نے کہیا کہ ہر مزدور، ہر کارکن دا مالی تحفظ ذمہ داری سمجھدی آں، راشن کارڈ پراجیکٹ وِچ کارکنان دی تعداد مزید ودھاماں گے۔
وزیراعلیٰ مریم نواز نے “ورلڈ ہیڈ اینڈ نیک کینسر ڈے” تے پیغام وِچ کہیا اے کہ ورلڈ ہیڈ اینڈ نیک کینسر ڈے سانوں ایس مہلک بیماری خلاف شعور، احتیاط تے ہمدردی دا پیغام دیندا اے۔ تمباکو نوشی، گٹکا، پان، شراب تے ناقص طرزِ زندگی کینسر دے بنیادی اسباب نے۔ اوہناں کہیا کہ لاہور وِچ پاکستان دا پہلا “نواز شریف انسٹیٹیوٹ آف کینسر ٹریٹمنٹ اینڈ ریسرچ” مکمل ہون دے نیڑے اے۔ وزیراعلیٰ نے جنوبی افریقہ وِچ فائرنگ نال چار پاکستانیوں دے جاں بحق ہون تے ڈاہڈے دکھ تے افسوس دا اظہار کیتا اے۔ مریم نواز شریف نے سوگوار ٹبراں نال ہمدردی دا اظہار کیتا اے۔
