شرحِ سود برقرار، عالمی کشیدگی نال برآمدات متاثر، ایہناں سال مہنگائی ودھے گی: سٹیٹ بینک
پیٹرولیم قیمتاں ودھن نال افراطِ زر 11 فیصد توں پار، مستقبل وِچ قیمتاں تے دباؤ وِچ کمی دی امید، آئی ایم ایف اہداف کامیابی نال حاصل کر رہے آں: گورنر جمیل احمد۔ ترسیلات 44 ارب ڈالر، زرمبادلہ ذخائر 20 ارب ڈالر توں ودھن دی توقع، 9 ارب ڈالر دے سونے دے ذخائر موجود، عالمی منڈی توں ہور خریداری دا ارادہ نہیں۔
کراچی (محمد حمزہ گیلانی) سٹیٹ بینک آف پاکستان نے نویں مالی سال 27-2026 دی پہلی مانیٹری پالیسی دا اعلان کردے ہوئیاں پالیسی ریٹ 11.50 فیصد تے برقرار رکھن دا فیصلہ کیتا اے۔ گورنر سٹیٹ بینک جمیل احمد نے مانیٹری پالیسی دے اعلان توں بعد پریس کانفرنس نال خطاب کردے ہوئیاں کہیا کہ بھانویں پچھلے کجھ مہینیاں دوران مہنگائی وِچ دوبارہ وادھا دیکھن وِچ آیا اے، تاہم آون والے اک توں دو مہینیاں وِچ افراطِ زر دی رفتار وِچ کمی آون دی امید اے، جدکہ ملکی معیشت، بیرونی شعبے تے زرمبادلہ دی صورتحال پچھلے ورھے دے مقابلے وِچ زیادہ مستحکم اے۔
جولائی 2025 توں فروری 2026 تک اوسط مہنگائی دی شرح تقریباً 5.5 فیصد رہی، تاہم مارچ توں جولائی دوران پیٹرولیم مصنوعات دیاں قیمتاں وِچ وادھے پاروں افراطِ زر دوبارہ ودھیا تے 11 فیصد توں پار ہو گیا۔ جاری مالی سال دوران مہنگائی سالانہ ہدف یعنی 5 توں 7 فیصد توں اچی رہن دا امکان اے، پر مستقبل وِچ قیمتاں تے دباؤ وِچ کمی دی توقع اے۔
اوہناں دسیا پچھلے مالی سال دے اختتام تے پاکستان دا کرنٹ اکاؤنٹ خسارہ صرف 13 کروڑ 90 لکھ ڈالر رہیا جدکہ ایہناں مالی سال دے اختتام تک ایہہ خسارہ مجموعی قومی پیداوار دے صفر توں اک فیصد دے وچکار رہن دی امید اے۔ گورنر دے مطابق برآمدات، ترسیلاتِ زر تے روشن ڈیجیٹل اکاؤنٹ دے ذریعے آون والے فنڈز ادائیگیاں دے توازن نوں ہور مضبوط بنان گے۔ جمیل احمد نے کہیا مالی سال 26-2025 دے اختتام تے بیرونِ ملک وسدے پاکستانیاں دی ترسیلاتِ زر 41 ارب 60 کروڑ ڈالر دی ریکارڈ سطح تے پہنچ گئیاں، جدکہ جاری مالی سال وِچ ایہناں دے 44 ارب ڈالر توں پار ہون دی توقع اے۔
اوہناں پیشگوئی کیتی کہ دسمبر 2026 تک سٹیٹ بینک دے زرمبادلہ ذخائر 20 ارب ڈالر توں ودھ جان گے، جیہدے نال بیرونی مالیاتی استحکام ہور مضبوط ہووے گا۔ جاری مالی سال دوران بیرونی قرضیاں تے واجبات دی مد وِچ تقریباً 21 ارب 50 کروڑ ڈالر دیاں ادائیگیاں متوقع نے، تاہم پچھلے سال دے مقابلے وِچ قرضیاں دیاں ادائیگیاں دا بوجھ تقریباً 4 ارب ڈالر گھٹ ہویا اے۔ غیر ملکی قرضیاں تے سود دیاں ادائیگیاں دا تخمینہ 3 ارب 50 کروڑ ڈالر لایا گیا اے، جدکہ سٹیٹ بینک دے فارورڈ واجبات وِچ وی 5 ارب ڈالر دی نمایاں کمی آئی اے۔
گورنر سٹیٹ بینک نے دسیا پاکستان دی بروقت قرض ادائیگیاں تے مالیاتی نظم و ضبط پاروں عالمی ریٹنگ ایجنسیاں نے ملک دی کریڈٹ ریٹنگ وِچ بہتری کیتی اے۔ ملکی معیشت پچھلے مالی سال دے مقابلے وِچ بہتر سمت وِچ گامزن اے۔ مالی سال 2025 وِچ جی ڈی پی دی شرح نمو 3.2 فیصد سی جیہڑی 2026 وِچ ودھ کے 3.7 فیصد رہی، جدکہ نویں مالی سال وِچ معاشی شرح نمو 3.5 توں 4 فیصد دے وچکار رہن دی توقع اے۔
اوہناں کہیا موسمیاتی حالات بہتر رہے تے زرعی شعبے دی کارکردگی وِچ وادھا ہویا تے معاشی نمو ایس توں وی بہتر ہو سکدی اے۔ سوالاں دے جواب دیندے ہوئیاں گورنر نے کہیا سٹیٹ بینک دی کوشش اے کہ فارورڈ ادائیگیاں دے بوجھ نوں ختم کردے ہوئیاں پاکستان نوں مستقبل وِچ قرض لین والے ملک دی بجائے قرض دین والے ملکاں دی صف وِچ لیاندا جاوے۔ ایس ویلے نجی شعبہ بیرونی قرضے لے رہیا اے جیہدے پاروں ملک دا مجموعی بیرونی قرض 100 ارب ڈالر توں پار ہو چکیا اے، تاہم زرمبادلہ ذخائر دی موجودہ پوزیشن ماضی دے مقابلے وِچ کِتے زیادہ مضبوط اے۔
اوہناں انکشاف کیتا کہ سٹیٹ بینک نے پچھلے تن ورھیاں دوران انٹربینک مارکیٹ توں 28 ارب ڈالر خریدے جیہدے نال زرمبادلہ ذخائر وِچ نمایاں وادھا ہویا۔ اوہناں دا کہنا سی حکومت لگاتار تن ورھیاں توں پرائمری بجٹ سرپلس برقرار رکھن وِچ کامیاب رہی اے، جدکہ مقامی قرضیاں دا حجم بیرونی قرضیاں دے مقابلے وِچ تیزی نال ودھ رہیا اے۔ گورنر جمیل احمد نے دسیا نجی شعبے نوں قرضیاں دی فراہمی وِچ نمایاں بہتری آئی اے تے پرائیویٹ سیکٹر کریڈٹ دی شرح 14.7 فیصد تک پہنچ گئی اے، جو معاشی سرگرمیاں وِچ وادھے دی علامت اے۔
اوہناں کہیا سٹیٹ بینک نے 2028 تک چھوٹے تے درمیانے درجے دے کاروبار نوں 1,500 ارب روپے دے قرضے فراہم کرن دا ہدف مقرر کیتا اے، جدکہ حکومتی تعمیراتی سکیم تحت ایہناں سال اک لکھ گھراں دی تعمیر دا منصوبہ وی جاری اے۔ پاکستان آئی ایم ایف پروگرام دے سارے اہداف کامیابی نال حاصل کر رہیا اے تے ایس حوالے نال پیشرفت اطمینان بخش اے۔ اوہناں دسیا جاری مالی سال دے اختتام تک ملکی برآمدات تقریباً 32 ارب ڈالر رہن دی توقع اے، تاہم عالمی کشیدگی تے بین الاقوامی تجارتی حالات برآمدات تے اثر انداز ہو رہے نے۔
اوہناں مزید دسیا کہ پاکستان کول ایس ویلے تقریباً 18 ارب ڈالر دے زرمبادلہ ذخائر توں علاوہ 9 ارب ڈالر مالیت دے سونے دے ذخائر وی موجود نے، تاہم فی الحال عالمی منڈی توں ہور سونا خریدن دا کوئی ارادہ نہیں۔ سٹیٹ بینک عالمی مالیاتی اداریاں دے تعاون نال ڈیجیٹل کرنسی تے لگاتار کم کر رہیا اے، جدکہ سائبر سکیورٹی دے خطرات نال نپٹن لئی جدید بائیو میٹرک نظام متعارف کرایا گیا اے تاکہ بینک اکاؤنٹس دے انتظام نوں ہور محفوظ بنایا جا سکے۔ اوہناں نویں کرنسی نوٹاں دے اجرا بارے کہیا کہ ایہدا انحصار وفاقی کابینہ دی منظوری تے اے تے امید اے ایہناں سال ایس حوالے نال منظوری مل جاوے گی، جیہدے بعد نویں کرنسی نوٹاں دے اجرا دی راہ ہموار ہووے گی۔
