ڈیجیٹل ٹیکنالوجی عوام دوست عدالتی نظام لئی ناگزیر: چیف جسٹس

وکلا برادری تربیت، پیشہ ورانہ ترقی دے مواقع توں بھرپور استفادہ کرے: یحییٰ آفریدی۔ پنجاب بار کونسل وفد دی ملاقات، عوام دوست عدالتی نظام لئی جاری کوششاں تے اتفاق۔

اسلام آباد (اے پی پی) چیف جسٹس پاکستان یحییٰ آفریدی نے کہیا کہ عدالتی نظام نوں خودکار، موثر تے عوامی ضروریات نال ہم آہنگ بنان لئی تمام فریقاں دی ڈیجیٹل مہارت ناگزیر اے، جدید ٹیکنالوجی دا موثر استعمال عوام دوست عدالتی نظام لئی کلیدی کردار ادا کرے گا۔ اوہناں نے ایہناں خیالات دا اظہار پنجاب بار کونسل دے وفد نال ملاقات وِچ کیتا۔ چیف جسٹس نے وفاقی جوڈیشل اکیڈمی دے ذریعے استعدادِ کار ودھان دے جاری مختلف پروگراماں توں آگاہ کیتا تے زور دِتا کہ وکلا برادری تربیت تے پیشہ ورانہ ترقی دے مواقع توں بھرپور استفادہ کرے۔

وائس چیئرمین پنجاب بار کونسل خواجہ قیصر بٹ دی زیرِ قیادت وفد وِچ ایگزیکٹو کمیٹی دے چیئرمین فخر حیات اعوان، پبلیکیشن کمیٹی دے چیئرمین ملک غلام عباس نسوانہ، سردار عبدالباسط خان بلوچ، ملک مقصود کھوکھر، رانا سر بلند خان، چودھری عمر محمود، سیکرٹری پنجاب بار کونسل رفاقت علی سہال، سیکشن آفیسر آفتاب احمد تے غلام رضا شامل سن۔ وفد نے عدالتی کمپلیکسز وِچ ای لائبریریاں، سولرائزیشن تے خواتین سہولت مراکز دے قیام نوں اہم اقدامات قرار دِتا۔ وفد نے چیف جسٹس نوں پاکستان لا ویب سائٹ تک رسائی لئی لاگ اِن معلومات وی پیش کیتیاں۔ ملاقات دے اختتام تے ایس عزم دا اعادہ کیتا گیا کہ بینچ تے بار باہمی تعاون نال پیشہ ورانہ استعداد وِچ اضافہ، ٹیکنالوجی تے مبنی عدالتی اصلاحات دے فروغ تے عوام دوست عدالتی نظام دے قیام لئی مشترکہ کوششاں جاری رکھن گے۔