جگر دے امراض صحت دے نظام لئی وڈا چیلنج، کینسر وِچ ہوشربا اضافہ ریکارڈ

آگاہی دی کمی تے بروقت سکریننگ نہ ہون پاروں ہیپاٹائٹس بی تے سی پھیل رہے، فیٹی لیور وی عام۔ پنجاب وِچ رجسٹرڈ تے غیر رجسٹرڈ 2 کروڑ توں زائد افراد ہیپاٹائٹس سی، 90 لَکھ افراد ہیپاٹائٹس بی وِچ مبتلا نیں۔ پنجاب حکومت دا 2030 تک 1 کروڑ 65 لَکھ شہریوں دی سکریننگ، علاج دا ہدف، مفت ٹیسٹ، ویکسین فراہم

لاہور (بلال چودھری) پنجاب وِچ جگر دیاں بیماریاں نے صحت دے نظام لئی وڈا چیلنج کھڑا کر دِتا، آگاہی دی کمی تے بروقت سکریننگ نہ ہون پاروں ہیپاٹائٹس بی تے سی دے وائرس تیزی نال پھیل رہے نیں جبکہ فیٹی لیور یعنی جگر وِچ چربی دے کیسز وِچ وی ہوشربا اضافہ ریکارڈ کیتا گیا اے، پنجاب وِچ ہر دوجا شخص فیٹی لیور دا شکار اے۔ غیر صحت مند خوراک، موٹاپا تے ورزش دی کمی ایس دی وڈی وجوہات قرار دِتیاں گئیاں نیں۔ اعدادو شمار دے مطابق پنجاب وِچ رجسٹرڈ تے غیر رجسٹرڈ 2 کروڑ توں زائد افراد ہیپاٹائٹس سی وِچ مبتلا ہون دا انکشاف ہویا اے، جبکہ رجسٹرڈ مریضاں دی تعداد تقریباً 1 کروڑ اے، رجسٹرڈ تے غیر رجسٹرڈ 90 لَکھ افراد ہیپاٹائٹس بی وِچ مبتلا نیں جبکہ رجسٹرڈ مریضاں دی تعداد تقریباً 50 لَکھ اے۔ حالیہ سکریننگ وِچ ہیپاٹائٹس سی دی شرح 8 اعشاریہ 9 فیصد تے ہیپاٹائٹس بی دی شرح 8 اعشاریہ 4 فیصد ریکارڈ کیتی گئی۔

ہور صوبیاں دے مقابلے وِچ پنجاب وِچ ہیپاٹائٹس سی دی شرح سب توں زیادہ اے، خیبر پختونخوا وِچ 6 اعشاریہ 5 فیصد تے سندھ وِچ 6 اعشاریہ 2 فیصد اے۔ حکومتِ پنجاب نے 2030 تک 1 کروڑ 65 لَکھ شہریوں دی سکریننگ تے ہر مثبت کیس دا مفت علاج دا ہدف مقرر کیتا اے، فیلڈ ہسپتالاں تے موبائل کلینکس وِچ مفت ٹیسٹ، ویکسین تے گھر تے ادویات دی فراہمی وی جاری اے۔ طبی ماہرین دا کہنا اے کہ صرف پچی تیہہ فیصد مریضاں نوں ای اپنی بیماری دا علم اے، ایس لئی آگاہی مہم ناگزیر اے۔ پروفیسرز دے مطابق ہیپاٹائٹس تے فیٹی لیور دونوں دا بروقت علاج نہ ہووے تے جگر دا سروسس تے کینسر دا خطرہ کئی گنا ودھ جاندا اے۔ طبی ماہرین نے شہریوں تے زور دِتا اے کہ ہیپاٹائٹس دا ٹیسٹ لازمی کروائن۔ ابتدائی تشخیص توں مکمل علاج ممکن اے، ویکسین لگوائن جبکہ ہیپاٹائٹس B دی محفوظ تے مؤثر ویکسین موجود اے، سرنج اک وار استعمال کرن، محفوظ خون دی منتقلی تے جراثیم توں پاک سرجیکل آلات دا استعمال یقینی بنائن، شیونگ دا سامان، ٹوتھ برش تے نیل کٹر مشترکہ استعمال نہ کرن۔