حادثاتی نہیں، اسیں نظریاتی، اختیاری، ارادی پاکستانی آں: خالد مقبول
اگر اساں اپنے حصے دا پاکستان لے لیا تے بے نام و نشان ہو جاؤ گے: چیئرمین متحدہ۔ اک طبقہ وسائل پیدا کرے، دوجا قابض ہو جاوے، ایہوجہا صوبہ نہیں چلن دیاں گے: خطاب
میرپور خاص (بیورو رپورٹ) چیئرمین ایم کیو ایم پاکستان ڈاکٹر خالد مقبول صدیقی نے میرپور خاص پوسٹ آفس چوک تے وڈے عوامی اجتماع نال خطاب کردے ہوئیاں کہیا کہ بانیانِ پاکستان نے پاکستان ارادہ تے اختیار کرکے حاصل کیتا سی، اسیں نظریاتی، ارادی تے اختیاری پاکستانی آں، حادثاتی پاکستانی نہیں۔ جے اساں اپنے حصے دا پاکستان لے لیا تے بے نام و نشان ہو جاؤ گے۔ ایہہ نام و نشان، ایوان تے اقتدار میرے ابا و اجداد دی خیرات اے، سڑکاں تے نکل آئے تے ایوان چھوڑ کے جانا پئے گا، اوہناں نے مزید کہیا کہ تسیں وسائل تے قبضہ کیتا پر عوام دے دلاں تے قبضہ نہیں کرسکے۔ عوام دے دلاں دی بھڑاس نکلی تے حقیقت دا علم ہو جاوے گا۔ اک طبقہ وسائل پیدا کرے تے دوجا طبقہ قابض ہو جاوے، ایہوجہا صوبہ نہیں چلن دیاں گے۔
سندھ وِچ نسل پرست جماعت دی حکمرانی اے، موجودہ حالات وِچ پاکستان نوں ایس توں زیادہ کوئی خطرہ نہیں۔ اسیں اٹھدے آں تے ہندوستان نہیں رہندا، جِتھے ساڈے قدم پین اوتھے پاکستان بن جاندا اے۔ اساں ہندوستان دی تقسیم تے اپنے لہو نال مہر ثبت کیتی، بعض قوّتاں نے ایس تاریخی جدوجہد تے کالک ملن دی کوشش کیتی، ادھر ہم ادھر تم دا نعرہ اساں نہیں لگایا سی۔ ایم کیو ایم موروثی سیاست نوں مسترد کردی اے، عام عوام دی حقیقی نمائندگی چاہندی اے۔ اوہناں نے باور کرایا کہ اسیں لڑنا جاندے آں پر لڑنا نہیں چاہندے کیونکہ مسائل دا آخری حل مذاکرات ای نیں۔ ساڈی طاقت مصنوعی ہجوم نہیں، عوام دی نظریاتی قوّت اے۔ ارتقاء یافتہ تہذیب دے امین آں۔ ماہ اگست توں بعد حتمی جدوجہد دا آغاز کراں گے۔ تیاری کر لو، پاکستان تہاڈے حوالے ہون جا رہیا اے۔
سانوں اپنے اجداد دا پاکستان واپس لینا اے، اپنا اک اک حصہ واپس لاں گے۔ ساڈی شرافت دا کچھ زیادہ فائدہ اٹھایا گیا، اسیں جِتھے کھڑے ہوندے آں اوہی پاکستان اے۔ ساڈی زبان پاکستان دی قومی زبان تے تہذیب پاکستان دی تہذیب اے۔ ساڈے توں زیادہ ضروری پاکستان اے۔ ایم کیو ایم تے کارکنان دا محبت دا سودا اے، ایہہ مریدان نال نہیں شہیداں نال سجی تحریک اے۔ تمام مظلوم تے محکوم قومیاں دا مقدمہ وی اسیں ای لڑاں گے۔ ایم کیو ایم لسانی جماعت نہیں اک تحریک اے۔ پاکستان دی تعمیر وِچ جنہاں لوکاں نے اپنا سب کچھ قربان کر دِتا اوہناں دی اولاداں نوں وی ایس ملک دے سیاسی، معاشی تے انتظامی نظام وِچ باعزت تے موثر مقام ملنا چاہیدا اے۔ اوہناں نے کہیا کہ پاکستان وِچ صوبے لسانیت تے قائم تے عصبیت نال بھرے نیں۔ ایس موقعے تے سینئر مرکزی رہنما سید امین الحق، شبیر احمد قائمخانی، قائدِ حزبِ اختلاف سندھ اسمبلی علی خورشیدی، ارشد ظفیر، شریف خان تے دیگر موجود سن۔
