مستقل تعیناتی توں بعد ڈیپوٹیشن تے رکھنا ناگزیر نہیں: ہائیکورٹ

بیت المال وِچ شبانہ رحمان دی ترقی تے ڈاکٹر ذیشان دی واپسی درست: جسٹس انعام۔ قبل از وقت محکمہ نوں واپسی لئی پیشگی نوٹس ضروری نہیں: فیصلہ، درخواست خارج

اسلام آباد (رضوان قاضی) اسلام آباد ہائیکورٹ نے پنجاب یونیورسٹی دے پروفیسر ڈاکٹر ذیشان دانش دی پاکستان بیت المال توں قبل از وقت واپسی دے خلاف درخواست خارج کر دِتی۔ جسٹس انعام امین منہاس دے جاری فیصلے وِچ عدالت نے اسٹیبلشمنٹ ڈویژن دے نوٹیفکیشن نوں قانون دے مطابق قرار دِتا تے کہیا کہ ڈیپوٹیشن تے آئے ملازم نوں مستعار ادارے وِچ برقرار رہن دا کوئی بنیادی یا قانونی حق حاصل نہیں ہوندا۔ ڈیپوٹیشن عارضی انتظام اے جیہڑا مفادِ عامہ تے ادارے دی ضروریات دے تابع ہوندا اے، مستقل افسر دی تعیناتی توں بعد ڈیپوٹیشنسٹ نوں عہدے تے رکھنا قانونی طور تے ناگزیر نہیں رہندا۔ بیت المال وِچ شبانہ رحمان دی بطور ڈائریکٹر جنرل ترقی توں بعد پروفیسر ذیشان دی اصل محکمہ نوں واپسی درست اے۔ ڈیپوٹیشن توں قبل از وقت واپسی سزا اے نہ ای ایس لئی پیشگی شوکاز نوٹس ضروری اے۔