امیر جماعتِ اسلامی نال ایرانی تے افغان سفیراں دیاں ملاقاتاں
امتِ مسلمہ نوں اتحاد تے تعاون نوں فروغ دے کے درپیش چیلنجز دا مقابلہ کرنا چاہیدا اے: حافظ نعیم؛ علاقائی امن تے مسلم دنیا نوں چیلنجز توں نمٹن لئی مشترکہ کوششاں جاری رکھن دا عزم
لاہور (سٹاف رپورٹر) امیر جماعتِ اسلامی حافظ نعیم الرحمٰن نال ایران دے سفیر رضا امیری مقدم تے افغانستان دے سفیر سردار احمد شکیب نے الگ الگ ملاقاتاں کیتیاں، جماعتِ اسلامی دے سیکرٹری جنرل امیرالعظیم دے انتقال تے گہرے دکھ دا اظہار کردے ہوئیاں تعزیت کیتی گئی۔ مرحوم دی دینی، سیاسی تے ملی خدمات نوں خراجِ عقیدت پیش کیتا گیا، اوہناں دی مغفرت لئی دعا کیتی گئی۔ ایس موقع تے پاک ایران تے پاک افغان تعلقات، خطے دی صورتحال، غزہ، لبنان تے افغانستان سمیت علاقائی امن، امتِ مسلمہ نوں درپیش چیلنجز، اقتصادی تعاون تے باہمی دلچسپی دے ہور امور تے تبادلۂ خیال کیتا گیا۔ ایرانی سفیر نال گفتگو وِچ حافظ نعیم الرحمٰن نے کہیا پاکستان تے ایران نوں معمولی اختلافات توں بالاتر ہو کے باہمی تعاون، اقتصادی روابط دے فروغ تے امتِ مسلمہ دے اتحاد لئی کردار ادا کرنا چاہیدا اے۔ اوہناں نے ایران، غزہ تے لبنان وِچ فوری مستقل جنگ بندی تے زور دیندے ہوئیاں کہیا جڈوں تک امریکی جارحیت دا سلسلہ جاری رہے گا، خطے وِچ پائیدار امن ممکن نہیں۔ مسلم ممالک نوں مشترکہ موقف اختیار کرنا چاہیدا اے کیونکہ ایہناں دے درمیان اختلافات توں صرف دشمن قوتاں فائدہ اٹھاندیاں نیں۔ امریکا تے اسرائیل دیاں جارحانہ پالیسیاں دے خلاف ایران تے عوام دے شانہ بشانہ کھلوتے آں۔
رضا امیری مقدم نے خطے وِچ کشیدگی دے خاتمے تے مذاکرات دے فروغ لئی پاکستان دے مثبت کردار نوں سراہندے ہوئیاں کہیا پاکستان، ایران، سعودی عرب تے ترکیہ وِچ مفاہمت تے تعاون خطے دے امن و سلامتی لئی ناگزیر اے۔ خطے دے مسائل دا پائیدار حل صرف مذاکرات نال ممکن اے۔ آبنائے ہرمز، غزہ تے لبنان وِچ جنگ بندی سمیت اہم علاقائی معاملات تے پیشرفت وقت دی اہم ضرورت اے۔ افغان سفیر نال ملاقات تے حافظ نعیم الرحمٰن نے کہیا مضبوط پاک افغان تعلقات خطے دے امن لئی ناگزیر نیں۔ مسلم ممالک نوں اتحاد تے باہمی تعاون نوں فروغ دے کے امتِ مسلمہ نوں درپیش چیلنجز دا مقابلہ کرنا چاہیدا اے۔ افغانستان وِچ امن و استحکام نہ صرف پاکستان تے افغانستان بلکہ پورے خطے دے مفاد وِچ اے۔ افغان سفیر احمد شکیب نے برادرانہ تعلقات نوں مزید مضبوط بنان تے زور دیندے ہوئیاں کہیا دونوں ممالک وِچ تعاون تے مثبت روابط خطے وِچ پائیدار امن تے ترقی لئی بنیادی اہمیت رکھدے نیں۔ اوہناں نے افغان عوام لئی پاکستان دے مختلف ادوار وِچ تعاون نوں سراہیا تے مختلف شعبیاں وِچ دوطرفہ روابط ودھان دی خواہش دا اظہار کیتا۔ ملاقاتاں دے اختتام تے امتِ مسلمہ دے اتحاد، علاقائی امن و استحکام تے اسلامی دنیا نوں درپیش چیلنجز توں نمٹن لئی مشترکہ کوششاں جاری رکھن دا عزم ظاہر کیتا گیا۔
