مریم نواز نے کساناں لئی لیب آن ویلز پراجیکٹ شروع کر دِتا

شاہ مکھی پنجابی ترجما:

مٹی تے پانی دے نمونیاں دا فوری سائنسی تجزیہ، موقعے تے رپورٹ تے رہنمائی ملے گی۔ گرین ریلوے کوریڈور منصوبے دا آغاز، ویران زمیناں تے 32 پارکس بنن گے

لہور (سٹاف رپورٹر) وزیراعلیٰ مریم نواز نے پنجاب دے کساناں لئی انقلابی پراجیکٹ لیب آن ویلز دا آغاز کر دِتا۔ کسان دی صرف اک کال نال جدید سائنسی لیبارٹری سیدھی اوہدے کھیت وِچ حاضر ہو جاوے گی۔ لیب آن ویلز دیاں ٹیماں کسان دے کھیت توں مٹی تے پانی دے نمونے آن دی سپاٹ (موقعے تے) حاصل کرن گیاں۔ کسان دے کھیت وِچ ای مٹی تے پانی دے نمونیاں دا فوری سائنسی تجزیہ کیتا جاوے گا۔

مریم نواز نے کیہا کہ مٹی دی صحیح پرکھ تے متوازن کھاداں دا ورتوں ای پنجاب نوں زرعی طور تے خودکفیل بنائے گا۔ پنجاب وِچ زراعت نوں پرانے طریقہ کاراں توں کَڈھ کے سائنسی تے ڈیجیٹل دور وِچ داخل کر دِتا گیا ہے۔ ساڈا ہدف کسان دی پیداواری لاگت نوں گھٹ کرنا تے فی ایکڑ حاصل ہون والی آمدن نوں ودھانا ہے۔ لیب آن ویلز دے ذریعے کھیتاں دی مٹی دی پی ایچ (pH) تے الیکٹریکل کنڈکٹیوٹی دی موقعے تے ای پیمائش کیتی جاوے گی۔ زمین وِچ نائٹروجن، فاسفورس تے پوٹاشیم ورگے بنیادی غذائی اجزاء دا سائنسی معائنہ ہووے گا۔ مٹی تے پانی دے ٹیسٹنگ نتائج نوں فوری طور تے موبائل ایپ وِچ درج کر دِتا جاوے گا۔ ٹیسٹنگ پوری ہوندے ای مٹی تے پانی دی سائنسی رپورٹ موقعے تے ای فوری جاری کر دتی جاوے گی۔

لیب آن ویلز دی برکت نال کھیت تے ٹیسٹ کرکے موقعے تے رپورٹ جاری کیتی جاوے گی تے فوراً رہنمائی وی دتی جاوے گی۔ بریفنگ وِچ وزیراعلیٰ نوں دَسیا گیا کہ رپورٹ وِچ زمین دی لوڑ دے مطابق کھاداں تے مناسب فصلاں دیاں سفارشاں شامل کیتیاں جان گیاں۔ رپورٹ دا لنک کسان نوں براهِ راست ایس ایم ایس تے واٹس ایپ دے ذریعے فوری بھیجیا جاوے گا۔ کسان اپنے موبائل تے اک کلک نال مٹی تے پانی دی پوری ڈیجیٹل رپورٹ دیکھ سکن گے۔

بریفنگ وِچ ہور دَسیا گیا کہ لیب آن موبائل دی شفافیت تے کڑی مانیٹرنگ یقینی بناون لئی سینٹرل کنٹرول روم فعال کر دِتا گیا ہے۔ سینٹرل کنٹرول روم توں ترے موبائل لیبارٹریز دی رئیل ٹائم جی پی ایس ٹریکنگ کیتی جاوے گی۔ فیلڈ ٹیماں دی کارکردگی جانچن لئی لائیو کیمرہ سٹریمنگ تے ڈیش بورڈ مانیٹرنگ دا نظام وی قائم کیتا گیا ہے۔ کسان دی اک کال تے موبائل لیب دا شیڈول وزٹ تے درخواست دا فوری اندراج کیتا جاوے گا۔ ڈسٹرکٹ لیب انچارج دی منظوری توں بعد لیب آن ویلز کسان دے کھیت دے جائزے لئی روانہ ہووے گی۔ موبائل ایپ دے ذریعے فیلڈ ٹیم دی موقعے تے حاضری دی رجسٹریشن یقینی بنائی جاوے گی۔ رئیل ٹائم کلاؤڈ ڈیٹا سٹوریج دے ذریعے پنجاب دا ڈیجیٹل جی پی ایس سوئل میپ تیار کیتا جاوے گا۔

فصلاں دی پیداوار تے کساناں دی آمدن وِچ وادھا جبکہ پائیدار زراعت دی بنیاد رکھ دتی گئی۔ سالانہ 20 ہزار مٹی دے نمونیاں دا ہدف مقرر، سالانہ 500 کسان فیلڈ ڈیز دا انعقاد ہووے گا۔ سالانہ 15 ہزار کساناں نوں تربیت دتی جاوے گی۔

ایس دوران مریم نواز دے سرسبز تے سموگ فری پنجاب ویژن دے تحت جدید دنیا دی طرز تے گرین ریلوے کوریڈور دے انقلابی منصوبے دا آغاز کر دِتا گیا۔ چار مرحلاں تے مشتمل منصوبے دے ذریعے ریلوے دی ویران تے کچرے دا شکار زمیناں تے 32 پارکس تعمیر کیتے جان گے۔ منصوبے دے پہلے مرحلے وِچ شاہدرہ توں رائیونڈ تک 20 ایکڑ رقبے نوں خوبصورت سبزہ زاراں، باغات تے سیر گاہاں وِچ تبدیل کر دِتا گیا۔ ریلوے ٹریک دے نال ملحقہ زمین تے 21 پارکس وی بنا دِتے گئے جو شہریاں نوں تفریح فراہم کر رہے نے تے ماحول دی بہتری وِچ وی حصہ پا رہے نے۔

وزیراعلیٰ مریم نواز شریف دا ایہ قدم ترقی یافتہ دیساں دی طرز تے ریلوے ٹریکس دے نال پارکس بنانا ہے۔ ایہ قدم پنجاب نوں سرسبز، خوبصورت بناون، بالاں، زنانیاں تے عام شہریاں نوں پارکس تے تفریح فراہم کرن دے مرحلہ وار منصوبے دی کڑی ہے۔ 45 کلومیٹر لمے پنجاب گرین ریلوے کوریڈور منصوبے دی مجموعی لاگت 1 ارب 77 کروڑ روپے توں ودھ ہے۔

چار پیکیجاں وِچ ونڈے منصوبے تے پنجاب ہارٹی کلچر اتھارٹی تے پاکستان ریلوے سانجھے طور تے کم کر رہے نے۔ وزیراعلیٰ مریم نواز شریف نے منصوبے دے دوجے مرحلاں دی تکمیل وِچ آؤن والیاں رکاوٹاں جلد دور کرن دی ہدایت کیتی۔ وزیراعلیٰ مریم نواز شریف نے گرین ریلوے کوریڈور منصوبے تے عمل درآمد دی رفتار ودھان دا حکم دِتا۔

شہریاں نے گرین ریلوے کوریڈور منصوبے تے وزیراعلیٰ مریم نواز شریف نوں خراجِ تحسین پیش کیتا تے شکریہ ادا کیتا۔ کوڑے داناں تے کچرے دے ڈھیر نوں خوبصورت پارکس وِچ بدلنا قابلِ تحسین ہے، شہریاں نے کیہا کہ بالاں نوں کھیڈن دی تھاں میسر آ گئی ہے۔ اک وڈی عمر دے شہری نے گل بات کردے ہوئے کیہا کہ یقین نہیں آ رہیا کہ پاکستان وِچ وی ایسا ہو سکدا ہے۔

مریم نواز شریف نے ہیپاٹائٹس دے عالمی دن تے قوم نال مل کے ہیپاٹائٹس دے خاتمے دے عزم نوں دہرایا تے کیہا کہ عوام ہیپاٹائٹس دی بروقت سکریننگ کروا کے جنداں نوں محفوظ بناؤن۔ شہریاں نوں ہیپاٹائٹس دی سکریننگ تے مفت علاج دی سہولت حکومت دی پہلی ترجیح ہے۔ سانجھیاں کوششاں نال ہیپاٹائٹس دا خاتمہ کریں گے۔