5 اگست نوں پشور جلسے وِچ اگلا لائحہ عمل دیواں گے: بیرسٹر گوہر

راولپنڈی (مانیٹرنگ ڈیسک، این این آئی) پی ٹی آئی چیئرمین بیرسٹر گوہر نے اڈیالہ جیل دے نیڑے میڈیا نال گل بات کردے ہوئے کیہا ہے کہ 5 اگست اہم دہاڑا (دن) ہووے گا، ایس دن ساڈا پشور وِچ وڈا جلسہ ہووے گا جِس وِچ اگلا لائحہ عمل دساں گے، آس ہے اپوزیشن اتحاد دی جماعتاں وی 5 اگست نوں نال ہون گیئاں۔

بیرسٹر گوہر دا کہنا سی کہ اساں آزاد کشمیر الیکشن دا بائیکاٹ کیتا، ٹرن آئوٹ گھٹ رہیا، صرف 5 توں 7 فیصد ٹرن آئوٹ نہ ہون دے برابر ہے، پی ٹی آئی سیاسی جدوجہد تے یقین رکھدی ہے، کوئی فرق نہیں پیندا الیکشن اج ہو جان یا کل، دوبارہ وی ہو جاندے نے، اساں کشمیر الیکشن دے بائیکاٹ دا فیصلہ سوچ سمجھ کے کیتا۔

بیرسٹر گوہر نے کیہا بانی پی ٹی آئی نال ملاقات ای بہتری دی کنجی ہے، اگر ملاقاتاں شروع ہوئیاں تاں حالات بدل جان گے، نورین نیازی تے پرچہ (مقدمہ) ہویا، ایسے پرچیاں نال حالات بہتر نہیں ہوندے، ایس ویلے دہشت گردی خلاف یکجہتی دی لوڑ ہے، شفاف الیکشن نال ای دیس اَگے جاوے گا، ایس ویلے سیاست تے پوائنٹ سکورنگ نہیں، مصلحت توں کام لینا چاہیدا ہے۔

اسیں کسی صورت کالعدم ٹی ٹی پی نوں سپورٹ نہیں کراں گے، ٹی ٹی پی دا بندہ جتھے وی ہے اسیں اوہنوں دہشت گرد سمجھدے آں، کوئی دو رائے نہیں کہ دہشت گردی خلاف ایکشن ہونا چاہیدا ہے۔

بیرسٹر گوہر نے حکمران اتحاد تے سخت تنقید کردے ہوئے کیہا کہ دونوں جماعتاں دی وجہ نال حالات ایس موڑ (نہج) تے پہنچے نے تے دونوں جماعتاں وڈے وڈے دعوے کر رہیاں نے، کشمیر لہور یا کشمور نہیں بنے گا بلکہ کشمیر پاکستان دی شہ رگ بنے گا۔ دونوں وڈیاں پارٹیاں نے وڈی سیاست کیتی تے ایس موڑ تک لے آئیاں نے، اک کہندا ہے لہور بنوا رہیا واں، دوجا کہندا کشمور بنوا رہیا واں، دونوں نے ایس مقام تک پہنچایا تے اج وی سیاست ہو رہی ہے، لوک اتھے مرے پئے نے تے اوہناں نوں اپنی سیٹاں دی پئی ہے۔ بیرسٹر گوہر نے کیہا نہتے لوکاں تے گولیاں چلاؤن دا سلسلہ مکنا (ختم ہونا) چاہیدا ہے۔