قانون دا غلط فائدہ چُکن دی اجازت نہیں دِتی جا سکدی: چیف جسٹس

عدالت وِچ ملزماں دی حاضری لازمی، غیر حاضری تے ضمانت منسوخ کرن دا اختیار: یحییٰ آفریدی؛ پرویز الٰہی، محمد خان دی ضمانت منسوخی لئی اپیلاں نبھیڑ دِتیاں، دو ہفتیاں وِچ سماعت دی ہدایت

اسلام آباد (کورٹ رپورٹر): سپریم کورٹ نے پنجاب حکومت دی سابق وزیراعلیٰ پرویز الٰہی تے محمد خان بھٹی دی ضمانتاں منسوخ کرن لئی دائر اپیلاں نبھیڑ دِتیاں تے قرار دِتا کہ جے ملزم ٹرائل کورٹ وِچ پیش نہ ہون تے ٹرائل کورٹ قانون مطابق ضمانت خارج کرن دا اختیار رکھدی اے۔ چیف جسٹس یحییٰ آفریدی دی سربراہی وِچ بینچ نے سماعت کیتی۔ پراسیکیوٹر پنجاب نے مؤقف اختیار کیتا کہ ملزم 18 واری سماعت ملتوی کروا چکے نیں۔ چیف جسٹس نے پچھیا کہ ملزم ٹرائل کورٹ وِچ پیش کیوں نہیں ہو رہے۔

پرویز الٰہی دے وکیل نے پراسیکیوٹر دے مؤقف دی مخالفت کردیاں ہوئیاں کہیا کہ ایہہ سچائی دے الٹ اے۔ پرویز الٰہی اک سال تک جیل وِچ رہے جد کہ ہلے تک چارج فریم ہویا تے نہ ہی کوئی گواہ یا ثبوت پیش کیتے گئے۔ چیف جسٹس یحییٰ آفریدی نے ریمارکس دِتے کہ ثبوت پیش کرنا پراسیکیوشن دی ذمہ داری اے، ملزماں دی عدالت وِچ حاضری لازمی اے تے قانون دا غلط فائدہ چُکن دی اجازت نہیں دِتی جا سکدی۔ سپریم کورٹ نے ٹرائل کورٹ نوں ہدایت کیتی کہ دو ہفتیاں دے اندر کیس دی سماعت کرے۔