پنجاب: کھرباں روپیاں دے سرکاری اثاثیاں تے نواں نظام نافذ
فروخت، لیز، جوائنٹ وینچر، رہن، معاہدیاں دے اختیارات تے مشتمل آرڈیننس جاری؛ ایسیٹ مینجمنٹ اتھارٹی نوں شراکت داری، سرمایہ کاری لئی وسیع اختیارات ہون گے
لاہور (محمد حسن رضا توں): پنجاب دے کھرباں روپیاں دے سرکاری اثاثیاں تے نواں قانونی نظام نافذ، فروخت، لیز، جوائنٹ وینچر، رہن تے براہِ راست معاہدیاں دے وسیع اختیارات تے مشتمل آرڈیننس جاری کر دِتا گیا۔
پنجاب حکومت نے پورے صوبے دے سرکاری اثاثیاں دے انتظام، تجارتی استعمال، فروخت، لیز، جوائنٹ وینچر تے نجی سرمایہ کاری نوں اک مرکزی نظام تحت لیاؤن لئی پنجاب اثاثہ جاتی انتظامی اتھارٹی آرڈیننس 2026 جاری کر دِتا۔ محکمہ قانون نے آرڈیننس جاری کیتا جیہدے تحت Asset Management Authority of Punjab (AMAP) قائم کر دِتی گئی، جیہنوں سرکاری اثاثیاں دی نشاندہی، منتقلی، ویلیوایشن، فروخت، لیز، رہن، نجی شعبے نال شراکت داری تے سرمایہ کاری دے منصوبے تیار کرن دے وسیع اختیارات حاصل ہون گے۔
آرڈیننس مطابق چیف سیکرٹری پنجاب اتھارٹی دے چیئرمین ہون گے جد کہ سینئر ممبر بی او آر، چیئرمین پی اینڈ ڈی بی، سیکرٹری خزانہ، سیکرٹری قانون، سیکرٹری ہاؤسنگ، سیکرٹری بلدیات، پنجاب پبلک پرائیویٹ پارٹنرشپ اتھارٹی دے چیف ایگزیکٹو تے ہور اعلیٰ افسر ایس دے ارکان ہون گے۔ وزیراعلیٰ اتھارٹی دے ایم ڈی دا تقرر کرن گیاں۔
آرڈیننس تحت اتھارٹی نوں اختیار دِتا گیا اے کہ اوہ مختلف سرکاری محکمیاں، خودمختار اداریاں تے سرکاری کمپنیاں دے ایہوجہے اثاثیاں دی نشاندہی کرے جیہناں نوں سرمایہ کاری یا تجارتی مقصداں لئی استعمال کیتا جا سکدا ہووے۔ اتھارٹی ایہناں اثاثیاں دی مارکیٹ ویلیو دا تعین، ریزرو پرائس مقرر کرکے ایہناں نوں فروخت، لیز، جوائنٹ وینچر، پبلک پرائیویٹ پارٹنرشپ یا ہور مالیاتی ماڈلاں راہیں نجی سرمایہ کاراں لئی پیش کر سکے گی۔
دستاویزاں مطابق اتھارٹی نوں اوپن آکشن، مسابقتی بولی، براہِ راست معاہدے، جوائنٹ وینچر، پبلک پرائیویٹ پارٹنرشپ تے Unsolicited Proposals راہیں وی منصوبے شروع کرن دا اختیار دِتا گیا اے۔ نجی شعبے دی تجاویز تے وی کارروائی ہو سکے گی پر ایہناں نوں بعد وِچ مسابقتی عمل توں گزارنا ہوئے گا۔ آرڈیننس مطابق ہر سرکاری اثاثے دی گھٹو گھٹ تِناں آزاد ویلیوایشنز کروائیاں جان گیاں تے ریزرو پرائس مقرر ہون تے ہی فروخت یا لیز دا عمل شروع ہوئے گا۔ کسی وی اثاثے دی فروخت یا لیز توں پہلاں عوامی نوٹس جاری کرنا لازمی قرار دِتا گیا اے۔ حکومت کسی وی اثاثے نوں اتھارٹی دے حوالے کر سکے گی، لوڑ پین تے واپس وی لے سکے گی۔
ایہہ اختیار وی دِتا گیا اے کہ بعض صورتوں وِچ متعلقہ قانوناں توں استثنیٰ دین دی سفارش کیتی جا سکے جد کہ کابینہ دی منظوری نال سرکاری اثاثیاں نوں (Mortgage) رکھن دی وی گنجائش موجود اے۔ اتھارٹی نوں اپنے مقصداں لئی کمپنیاں، ٹرسٹس، سوسائٹیاں، سپیشل پرپز وہیکلز (SPVs) قائم کرن، ملکی و غیر ملکی سرمایہ کاراں نال معاہدے کرن، کنسلٹنٹس دیاں خدمات حاصل کرن تے سرمایہ کاری دے مالیاتی ڈھانچے تشکیل دین دے اختیارات وی دِتے گئے نیں۔
اتھارٹی دا وکھرا فنڈ قائم ہوئے گا، جیہدے وِچ وفاقی و صوبائی حکومت دیاں گرانٹس، اثاثیاں دی فروخت تے لیز توں ملن والی آمدن، سرمایہ کاری، قرضیاں تے ہور ذرائع توں حاصل ہون والیاں رقماں جمع ہون گیاں۔ ہر سال اتھارٹی دا آڈٹ ہوئے گا تے سالانہ رپورٹ حکومت نوں پیش کرنا لازمی ہوئے گا۔
آرڈیننس وِچ کہیا گیا اے کہ جے ایس قانون دی کسی شق دا کسی دوجے صوبائی قانون نال تضاد پیدا ہوندا اے تاں ایس آرڈیننس دیاں متعلقہ شقاں مؤثر ہون گیاں۔ اتھارٹی دے چیئرمین، ایم ڈی، افسراں تے ملازماں نوں نیک نیتی نال کیتے گئے قدماں تے قانونی تحفظ وی دِتا گیا اے۔
حکومت نے آرڈیننس نال جاری Statement of Objects and Reasons وِچ مؤقف اختیار کیتا اے کہ پنجاب کول موجود قیمتی سرکاری اثاثے مختلف محکمیاں وِچ خندرے ہون پاروں موثر انداز وِچ استعمال نہیں ہو رہے layout۔ نئی اتھارٹی راہیں ایہناں اثاثیاں نوں مربوط نظام تحت لیا کے نجی سرمایہ کاری، معاشی سرگرمی، روزگار دے مواقع تے حکومتی آمدن وِچ وادھا کیتا جائے گا جد کہ غیر فعال سرکاری اثاثیاں نوں معاشی ترقی لئی ورتیا جائے گا۔
