کئی شہراں وِچ بارش، ہور 4 بندے جاں بحق، ہڑ متاثرین دی نقل مکانی
کئی علاقیاں وِچ بجلی معطل، فیروزوالہ تے جلال پور پیروالا وِچ سیلابی صورتحال برقرار، شہری محصور، امدادی سرگرمیاں جاری | بارشاں دا نواں سسٹم 5 اگست تک رہے گا، دریاواں دے بہاؤ وِچ اضافے، اربن فلڈنگ تے لینڈ سلائیڈنگ دا خطرہ: پی ڈی ایم اے
اسلام آباد، لاہور، کراچی، فیروزوالہ (نامہ نگاران، نیوز ایجنسیاں) دیس دے وکھ وکھ شہراں وِچ مون سون دے نویں سپیل نے انٹری دے دِتی۔ لاہور، اسلام آباد، راولپنڈی تے دوجیاں تھاواں تے بارش نال موسم خوشگوار ہو گیا تے گرمی دی شدت وِچ کمی آئی، نشیبی علاقے جل تھل ہو گئے، شاہراہاں تے پانی جمع ہو گیا جِس نال ٹریفک دا نظام سخت متاثر ہویا، کئی علاقیاں وِچ فیڈرز ٹرپ ہون نال بجلی دی سپلائی معطل ہو گئی، وکھ وکھ واقعات وِچ دو بالاں (بچوں) سمیت چار بندے جاں بحق تے چار زخمی ہو گئے۔
بارشاں دا نواں سسٹم 5 اگست تک دیس وِچ کتھے ہولی تے کتھے تیز بارش برسائے گا، پچھلے دہاڑے (دن) لاہور وِچ کتھے ہولی تے کتھے تیز بارش دا سلسلہ جاری رہیا، لکشمی چوک وِچ 15.2، اپر مال 0.8، مغلپورہ 7.8، تاجپورہ 4.4، چوک ناخدا 13.2، پانی والا تالاب وِچ 19.6، فرخ آباد 1، سگیاں 0.2 ملی میٹر بارش ریکارڈ کیتی گئی۔ ایس توں علاوہ وزیرآباد، پھالیہ، مریدکے، خانپور تے ہری پور تے دوجے شہراں وِچ بارش نال موسم خوشگوار ہو گیا، کالی گھٹاواں دا راج ہون نال گرمی دی شدت وِچ وی کمی آئی۔
گوجرانوالہ وِچ طوفانی بارش نال نشیبی علاقے تے گلی محلے ڈُب گئے جبکہ شہر دے انڈر پاس پانی نال بھر گئے؟ سول ہسپتال روڈ، سیالکوٹ روڈ، کمشنر روڈ، ڈی سی روڈ، پسرور روڈ، گل روڈ تے کئی کئی فٹ پانی جمع ہو گیا۔ جناح روڈ راجہ کالونی گلی نمبر 1 وِچ 24 ورھیاں (سال) دا عبداللہ بارش دے دوران اپنے گھر دے مین گیٹ توں کرنٹ لگن نال ڈسٹرکٹ ہسپتال وِچ دم توڑ گیا۔ ڈپٹی کمشنر دے مطابق شہر وِچ اوسطاً 140 ملی میٹر بارش ریکارڈ ہوئی، سیالکوٹ وِچ دو گھنٹے دی بارش نے شہر دے وکھ وکھ علاقیاں نوں ڈبو دِتا، دارا ارائیاں تے آلے دوالے (ارد گرد) دے علاقیاں وِچ کئی کئی فٹ پانی جمع ہو گیا۔ پانی لوکاں دے گھراں تے دکاناں وِچ وڑ (داخل ہو) گیا۔
ایس توں علاوہ ملتان دی تحصیل جلال پور پیروالا وِچ دریائے چناب دا سیلابی پانی 2 درجن توں ودھ بستیاں وِچ وڑ گیا جِس پاروں لوک نقل مکانی تے مجبور ہو گئے، سینکڑوں ایکڑ اراضی تے کھڑیاں فصلاں ڈُب گئیاں جبکہ سیلابی پانی وِچ ڈُب کے اک بندہ جاں بحق ہو گیا۔ سرگودھا دے قصبہ بھیرہ دے علاقے بھوجی کوٹ دھوری روڈ رکھ چراگاہ وِچ بارش پاروں ڈیری فارم تے چھت ڈگن نال ملبے ہیٹھ دب کے مزدور فیملی دے دو بھرا پانچ مہینیاں دا محمد ایان تے پانچ ورھیاں دا محمد حسیب سکنہ شجاع آباد جاں بحق تے اوہناں دی ماں تے 8 ورھیاں دی بچی سمیت چار بندے 22 ورھیاں دی کرن رحمان، 35 ورھیاں دا یوسف، 8 ورھیاں دی ثمینہ یوسف تے 10 ورھیاں دا محمود عمران شدید زخمی ہو گئے جبکہ شیخوپورہ وِچ پانی دے ریلے نال ریلوے ٹریک متاثر ہویا۔
فیروزوالہ توں نامہ نگار دے مطابق نالہ بھیڑ وِچ پین والے شگاف پاروں فیروزوالہ تے آلے دوالے وِچ سیلابی صورتحال بدستور برقرار ہے۔ پٹھان کالونی، خرم ٹاؤن، شہباز ٹاؤن تے رانا ٹاؤن سمیت کئی آبادیاں ڈُب گئیاں نے، جبکہ کئی علاقیاں وِچ شہری اپنے گھراں وِچ بند (محصور) نے تے زمینی رابطہ پوری طرحاں کٹیا جا چکا ہے۔ رانا ٹاؤن وِچ کجھ تھاواں تے چھ توں ست فٹ تک پانی کھڑا ہے، جِس پاروں آؤن جاں دا اکو ذریعہ کشتیاں رہ گئیاں نے۔
پی ڈی ایم اے دے مطابق پورے پنجاب وِچ 5 اگست تک بارش تے وڈے دریاواں وِچ پانی دے بہاؤ وِچ وڈے اضافے دا امکان ہے۔ لاہور، راولپنڈی، گوجرانوالہ، گجرات، سیالکوٹ، فیصل آباد تے ملتان وِچ اربن فلڈنگ جبکہ مری گلیات تے پہاڑی علاقیاں وِچ فلیش فلڈنگ تے لینڈ سلائیڈنگ دا خطرہ ہے۔ پنجاب دے زیادہ تر دریاواں وِچ پانی دا بہاؤ نارمل ہے، دریائے سندھ وِچ کالاباغ تے تونسہ تے تھلویں (نچلے) درجے دی سیلابی صورتحال ہے۔ دریائے راوی وِچ ہیڈ سدھنائی تے وی سیلاب مُک گیا تے بہاؤ معمول تے آ گیا۔ دریائے سندھ وِچ سکھر بیراج تے پانی دی آمد وِچ وادھا ہویا ہے تے بہاؤ ودھ کے 2 لَکھ 78 ہزار کیوسک ہو گیا جِس نال تھلویں درجے دا سیلاب آ گیا۔ کالاباغ، تونسہ تے گڈو بیراج تے تھلویں درجے دا سیلاب برقرار ہے۔
