حکومت دی معاشی پالیسی صرف پٹرول مہنگا کرنا: سہیل آفریدی
عمران دی مقبولیت برقرار، 5 اگست نوں سیمی فائنل کامیاب بناؤ، فائنل وی ترت ہووے گا | کشمیر، بلوچستان تے دوجے علاقیاں دے مسئلے طاقت نال نہیں، سیاسی طریقے نال حل کرو
پشاور (مانیٹرنگ ڈیسک) وزیراعلیٰ خیبر پختونخوا سہیل آفریدی نے دیس وِچ جاری سیاسی تے معاشی پالیسیاں تے کڑی تنقید کردے ہوئے کیہا ہے کہ کون تہانوں غلط مشورے دندا ہے؟ اوہ سب توں وڈا بے وقوف ہے، آؤ عوام دا سامنا کرو، عوام دا سامنا کرن توں پرہیز کرن والیاں حکومتاں کبھی کامیاب نہیں ہندیاں، ایس لئی حکمراناں نوں عوام دے وچکار آ کے اپنی کارکردگی دا جواب دینا ہووے گا۔
پشاور یونیورسٹی دے کانووکیشن نال خطاب کردے ہوئے اوہناں کیہا کہ مسلسل ریاستی جبر دے باوجود عمران خان دی مقبولیت برقرار ہے، 5 اگست نوں اساں سیمی فائنل کامیاب کرنا ہے، ایس توں بعد پھر بہت ترت (جلد) فائنل وی ہووے گا، مزید کیہا کہ کشمیر، بلوچستان تے دوجے علاقیاں دے مسئلے طاقت دے استعمال نال نہیں بلکہ سیاسی تے آئینی طریقہ کار نال حل کیتے جانے چاہیدے نے، اوہناں کیہا کہ حکومت دی معاشی پالیسی صرف پٹرول مہنگا کرنا ہے۔
وفاق کول معیشت بہتر بناؤن لئی پٹرول مہنگا کرن توں سوا کوئی موثر پالیسی نہیں، عمران خان دی حکومت دے خاتمے توں پہلاں ملکی معیشت 6.1 فیصد دی شرح نال ترقی کر رہی سی، اج جی ڈی پی گروتھ تقریباً 3 فیصد رہ گئی، قومی قرضہ وی کجھ ورھیاں وِچ 43 ہزار ارب روپے توں ودھ کے 76 ہزار ارب روپے تک پہنچ گیا ہے۔ اوہناں دَسیا کہ اوہناں دا صوبہ روزانہ 800 ایم ایم سی ایف ڈی توں ودھ گیس پیدا کردا ہے، آئین دے مطابق اوہنوں گیس دی فراہمی وِچ ترجیح ملنی چاہیدی ہے، صوبے وِچ جاری گیس لوڈشیڈنگ ناقابلِ قبول ہے۔
سہیل آفریدی نے دَسیا کہ خیبر پختونخوا حکومت نے یونیورسٹیاں دی مالی مدد ودھا کے 12 ارب روپے کر دِتی ہے، 2017ء توں 2024ء تک دے سارے پنشن واجبات اکو وار (یکمشت) ادا کیتے جا چکے نے تے 2024ء توں جون 2026ء تک دے بقایا جات وی جاری کر دِتے گئے، وفاقی حکومت ولوں احساس سکالرشپ پروگرام بند کیتے جانے دے باوجود خیبر پختونخوا حکومت ایس نوں اپنے وسایل نال جاری رکھے گی۔
