کشمیر الیکشن مرحلہ وار کراؤنا دھاندلی دی بنیاد سی: گورنر پنجاب

رات 11 وجے توں بعد نتائج بدلے گئے، ایسے متنازعہ انتخابات دا کوئی فائدہ نہیں | حکومت وِچ محبت نہیں ملکی استحکام لئی شامل ہاں: شاہ لطیف بھٹائیؒ دے مزار تے حاضری

مٹیاری (نمائندہ دنیا) گورنر پنجاب سردار سلیم حیدر خان نے شاہ عبداللطیف بھٹائیؒ دے مزار تے حاضری دِتی۔ اوہناں کیہا کہ عرس دے پہلے دہاڑے (دن) شرکت میرے لئی اعزاز دی گل ہے، شاہ لطیفؒ عظیم صوفی بزرگ تے علم و محبت دے پیامبر سن، حکومتِ سندھ، محکمہ ثقافت، ذوالفقار شاہ تے میڈیا دا شکر گزار ہاں۔

اوہناں مزید کیہا کہ سیاسی معاملیاں تے فیصلہ پارٹی قیادت کرے گی، پارٹی پالیسی بابت ہر فیصلہ عوام دے سامنے رکھیا جاوے گا، کشمیر الیکشن نوں ڈویژن وائز کراؤنا دھاندلی دی بنیاد سی، بلاول بھٹو زرداری نے الیکشن نتائج تے ویلے سر احتجاج کیتا، رات 11 وجے توں بعد انتخابی نتائج بدلدی نظر آئے، صاف نظر آؤن والیاں نشستاں دے نتائج بدلے گئے، ایسے متنازعہ انتخابات دا کوئی فائدہ نہیں، گلگت بلتستان انتخابات وِچ وی نتائج تے نوٹیفکیشن تے سوال اٹھے، عوام مہنگائی تے بے روزگاری توں سخت پریشان نے، حکومت کول عوامی مسائل دے حل دا کوئی واضح وژن نہیں، غریب بندہ دو ویلے دی روٹی لئی ترس رہیا ہے، چھوٹے ملازمین دیاں نوکریاں ختم کرن دی پالیسی عوام دشمن ہے، عوامی مفاد تے پیپلز پارٹی ہمیشہ دوٹوک مؤقف اپناندی ہے، جہاں عوام نال زیادتی ہووے گی پیپلز پارٹی آواز بلند کرے گی، حکومت وِچ شامل ہون دا مطلب چپ رہنا نہیں، عوام دے حق وِچ بولاں گے، پیپلز پارٹی عوامی مسائل تے کبھی سمجھوتہ نہیں کرے گی، وفاقی حکومت وِچ محبت نہیں بلکہ ملکی استحکام لئی شامل ہاں، نواب شاہ توں بھٹ شاہ تک سڑک تے کتھے وی رکاوٹ یا خرابی محسوس نہیں ہوئی، اندرونِ سندھ نوں کھنڈر قرار دینا صحیح تاثر نہیں، اگر کتھے خرابی ہے تاں دَسیا جاوے، پنجاب دیاں کئی سڑکاں دی حالت وی سب دے سامنے ہے، تنقید سچائی تے زمینی صورتحال دی بنیاد تے ہونی چاہیدی ہے۔