منشیات دے ملزماں دا ٹرائل ترت مکمل ثبوتاں دی بنیاد تے سزاواں دواؤ: تاخیر تے سپریم کورٹ دا اظہارِ تشویش
تن توں چار گواہیاں سالاں وِچ مکمل نہیں ہوندیاں، 265 گرام چرس دا کیہ کریئے؟ ٹرائل کیوں مکمل نہیں ہویا؟ جسٹس نعیم اختر | گڈی خریدن لئی رقم منتقل کرنا کِداں جرم ہے؟ بینک افسر نوں کیہ پتا ایہ دھماکے وِچ استعمال ہووے گی؟ دونوں مقدمے نمٹا دِتے
اسلام آباد (کورٹ رپورٹر) سپریم کورٹ نے 265 گرام چرس برآمدگی دے ملزم ندیم عرف چینو دی ضمانت منسوخی دی درخواست مسترد کردے ہوئے منشیات دے مقدمیاں دے ٹرائل وِچ غیر ضروری تاخیر تے تشویش دا اظہار کیتا۔ جسٹس نعیم اختر افغان نے دو رکنی بینچ دی سربراہی کیتی تے پُچھیا کہ صرف 265 گرام چرس ہے، کیہ کریئے؟ ہُن تک ٹرائل مکمل کیوں نہیں ہویا؟ ریمارکس دیندے ہوئے کیہا کہ اے این ایف دے مقدمیاں وِچ عموماً تن توں چار گواہ ہوندے نے پر تن توں چار گواہیاں وی سالاں وِچ مکمل نہیں ہوندیاں۔ ٹرائل ترت (جلد) مکمل کرا کے ثبوتاں (شواہد) دی بنیاد تے ملزماں نوں سزاواں دوائیاں جان۔
جے الزام نسبتاً معمولی ہووے تے ٹرائل ویلے (بروقت) مکمل نہ ہووے تاں عدالتاں قانون دے مطابق ملزماں نوں ضمانت دین تے مجبور ہو جاندیاں نے۔ ایس توں علاوہ سپریم کورٹ نے کالعدم بلوچستان لبریشن آرمی نال مبینہ تعلق دے مقدمے وِچ گرفتار ملزم بلال دی ضمانت منسوخی دی درخواست مسترد کر دِتی تے استغاثہ توں ملزم تے کالعدم تنظیم دے وچکار تعلق دے ثبوتاں تے سوال چکّے۔ جسٹس نعیم اختر افغان دی سربراہی وِچ دو رکنی بینچ نے سماعت کیتی۔ سرکاری وکیل نے ہور دستاویزام جمع کران لئی مہلت منگی۔ جسٹس نعیم اختر افغان نے ریمارکس دِتے کہ تسیں ملزم دا بی ایل اے نال رابطہ کِداں جوڑ دِتا؟ ملزم بینک منیجر ہے، صرف گڈی دی خریداری لئی رقم منتقل کرنا کِداں جرم بن سکدا ہے؟ بینک افسر نوں کیہ پتا گڈی کسے دھماکے وِچ استعمال ہووے گی، قابلِ اعتماد ثبوت پیش کیتے جان۔ عدالت نے دونوں مقدمے نمٹا دِتے۔
